Astanalyq jas fýtbolshylar Túrkııada ótken halyqaralyq týrnırdiń chempıony atandy

Nur-Sultan qalasy olımpıadalyq rezervtiń mamandandyrylǵan balalar men jasóspirimderge arnalǵan sport mektebiniń (SDıÝSShOR №8) túlekteri Túrkııanyń Antalıa qalasynda jasóspirimder arasynda fýtboldan ótken halyqaralyq týrnırdiń chempıony atanyp keldi.

«Bul men jattyqtyryp júrgen balalardyń alǵashqy halyqaralyq jarysy. Jáne olar birden chempıon atandy. Fýtboldan týrnır 2011 jyly týǵan jasóspirimder arasynda ótti. Balalarmen birge Túrkııada 10 kúndeı bolyp, jattyǵý ótkizip, baq synadyq. Oıyndaǵy bizdiń basty qarsylaysyz túrik fýtbol komandalary boldy. Negizi qatysýshylardyń sany kóbirek bolǵan. Sońǵy jaǵdaılarǵa baılanysty Reseı, Ýkraına jáne basqa da elderdiń komandalary jarystan bas tartty», - dedi Erbol Jaılaýbekov.

Jattyqtyrýshynyń aıtýynsha, atalǵan synda 10 fýtbol komandasy ózara baq synasqan.

«Týrnır barysynda barlyǵy bizdiń komanda 6 oıyn ótkizdik. Jáne bárinde sátti oınap, jeńiske jettik. Aqtyq synda Antalıanyń myqty degen komandasy qarsylas boldy, degenmen bizdiń oıynshylar eseni jibermedi. Men tárbıelep jatqan balalar fýtbolmen 2 jyl boıy turaqty aınalysyp keledi. Biz buǵan deıin el ishinde qalalarda ótken fýtbol jarysyna qatysyp júrdi. Meniń jattyqtyrýshy retindegi maqsatym – Eýropada fýtboldan týrnır qalaı ótetindigin balalarǵa kórsetkim keldi», - deıdi ol.

Túrkııadan oralǵan jas chempıondardy elorda áýejaıynan ata-analary men jaqyndary qýanyshpen qarsy aldy.