Astanalyq veloshabandozdar Azııa chempıonatynda kúmis enshiledi
ASTANA. 13 naýryz. QazAqparat - Astanalyq veloshabandozdar Azııa chempıonatynda kúmis aldy.
Bul týraly astana.kz saıtyna qalalyq Týrızm, dene tárbıesi jáne sport basqarmasynan málim etti.
Úndistan astanasy Nıý-Delı qalasynda tas jolda jáne trek ústindegi jarystan 33-shi Azııa chempıonaty ótýde. Trektegi jarys 7 naýryzda bastaldy. Qazaqstan quramasy sapynda óner kórsetetin astanalyq sport mektebiniń velosport boıynsha alty tárbılenýshisi jaqsy nátıje kórsetti.
«Komandalyq sprıntte elordalyq Almaz Kıneev pen Zakı Sultanov besinshi orynǵa taban tiredi. Birinshi orynda Koreıa sportshylary, ekinshide - malazııalyqtar, al úshinshi orynda japondyq veloshabondozdar», - delingen habarlamada.
Vedomstvonyń málimeti boıynsha, komandalyq jarysta aty shyǵyp júrgen Qazaqstannyń jas quramasy Japonııaǵa jol berip, ekinshi oryndy qanaǵat tutty. Qurlyqaralyq birinshilikte bizdiń elordalyq sportshylar Nıkıta Klevanov pen Marlen Toqseıitov kúmis júldege ıe boldy. Ekeýi de elimizdiń ótken jylǵy trek jarysyndaǵy chempıony bolyp tabylady.
Qazaqstan delegatsııasy quramynda 51 adam bar. Bul erler men áıelder quramasy, túrli jas ereksheligindegi jastar.
Búgin, 13 naýryzda Azııa chempıonatynyń tas joldaǵy velojarysy bastalady. Jeke jarysta Astana qalasy №6 olımpıada rezerviniń mamandandyrylǵan balalar men jasóspirimder sport mektebiniń ókili, 2012 jylǵy Qazaqstan chempıony Dmıtrıı Rıve baq synamaq.
