Astanalyq ýnıversıtettiń oqytýshylary men qyzmetkerleri arasynda ótken spartakıada shańǵy jarystarymen aıaqtaldy
ASTANA. Naýryzdyń 16-sy. QazAqparat /Gúlmıra Álıakparova/ - Ústimizdegi jylǵy qańtar aıynyń 4-inde S.Seıfýllın atyndaǵy Qazaq agrotehnıkalyq ýnıversıtetiniń professorlyq-oqytýshylyq quramy men qyzmetkerleri arasynda bastalǵan «Sergektik jáne densaýlyq» spartakıadasy ótken aptanyń sońynda astanalyq saıabaqta ótken shańǵy jarystarymen aıaqtaldy,
dep habarlaıdy QazAqparat.
Shańǵy jarystaryna atalmysh ýnıversıtetettiń oqytýshylary men qyzmetkerleriniń qatysý qarqyny jylda joǵary bolady. 100-den astam sportshy spartakıada sheńberindegi sońǵy saıysta óz komandalarynyń qorjynyn qosymsha upaı sandarymen toltyrýǵa tyrysty.
Jarys jas erekshelikterine baılanysty erler men áıelder arasynda tıisinshe, 1,5 jáne 0,5 shaqyrym qashyqtyqqa ótti. Saıysta ýnıversıtettiń aǵa býyn qyzmetkerleri ádettegideı, joǵary belsendilik tanytyp, salaýatty ómir saltyn qalyptastyrýda jastarǵa úlgi kórsetti. Egde sportshylardyń aldy bıyl 70 jasqa tolady.
Búgingi kúni komandalardyń spartakıada barysynda jınaǵan upaı sandary eseptelip, jeńimpazdar anyqtalý ústinde. Aıta keteıik, jarystar sporttyń 5 túri - voleıbol, mını-fýtbol, ústel tennısi, shahmat jáne prezıdenttik kópsaıystar boıynsha ótti.
«Professorlyq-oqytýshylyq quram men qyzmetkerlerdiń arasyndaǵy bul spartakıadaǵa qatysýshylar qashanda kóp. Mysalǵa, tek voleıbolǵa 8-10 adamnan quralǵan 10 komanda qatysady. Bul áıelder arasyndaǵy toptardy esepke almaǵandaǵy san», - deıdi S.Seıfýllın atyndaǵy QazATÝ Sport klýbynyń tóraǵasy Serikjan Súleımenov.
