Astanalyq ýnıversıtette dástúrli spartakıada jappaı júgirýmen márege jetti
ASTANA. 18 maýsym. QazAqparat - S.Seıfýllın atyndaǵy Qazaq agrotehnıkalyq ýnıversıtetinde oqý ornynyń 55 jyldyǵyna arnalǵan «Sergektik jáne densaýlyq» dástúrli spartakıadasy máresine jetti. Bul týraly JOO-nyń baspasóz qyzmetinen málim etti.
Ýnıversıtet pen onyń janyndaǵy kolledjdiń oqytýshylary men qyzmetkerleri arasyndaǵy spartakıada bıyl basketbol (áıelder arasynda), shaǵyn fýtbol (erler arasynda), voleıbol (áıelder, erler), shahmat, ústel tennısi, shańǵy jarysy jáne jazǵy Prezıdenttik synaqtar boıynsha ótti.
Ústimizdegi jyldyń 9 qańtarynda bastalyp, 12 maýsym kúni jazǵy Prezıdenttik synaqtar jarysymen máresine jetken spartakıadaǵa barlyǵy 505 adam qatysty.
Jas erekshelikteri boıynsha orta qashyqtyqqa júgirýden ýnıversıtet pen kolledjdiń 91 oqytýshysy men qyzmetkeri baqtaryn synady.
Sporttyń 8 túri boıynsha ótkizilgen spartakıadanyń nátıjesinde jalpykomandalyq esepte birinshi oryndy ákimshilik-sharýashylyq bóliminiń komandasy jeńip aldy. Ekinshi oryn kompıýterlik júıeler jáne kásiptik bilim berý fakýltetiniń, úshinshi oryn ekonomıkalyq fakýltettiń komandalaryna buıyrdy.
