Astanalyq týrıst Gonkongta daýys bergen alǵashqy saılaýshy boldy (FOTO)
BEIJІŃ-GONKONG. QazAqparat - Jergilikti ýaqytpen saǵat 07:30-da Qazaqstannyń Gonkongtaǵy Bas konsýldyǵy janyndaǵy №243 saılaý ýchaskesinde birinshi bolyp Astana turǵyny Álııa Mahambetova daýys berdi.
Bul týraly QazAqparat tilshisine telefon arqyly atalǵan saılaý ýchaskesiniń tóraǵasy, QR Gonkongtaǵy Bas konsýldyǵynyń ekinshi hatshysy Arman Ahmetov málim etti.
«Ol Gýandýn provıntsııasy Gýanchjoý qalasynan arnaıy daýys berý úshin kelgen. Saılaýǵa birneshe kún qalǵanda ol konsýldyqqa telefon shalǵan bolatyn. Búgin osy jerge kelip, esepten shyǵarylǵany týraly talonyn kórsetip, ony tizimge qostyq», - dedi ol.
Dıplomattyń sózine qaraǵanda, Sıangan (Gonkong) Arnaıy ákimshilik aýdanyndaǵy 70% astam qazaqstandyq saılaýshy - kásipkerler, qazaqstandyq kompanııalardyń ókilderi jáne týrıster, shamamen 20% - stýdentter. «Jańa ǵana Almaty-Gonkong reısimen ushyp kelgen «Eır Astana» ushaǵynyń ekıpajy - eki kapıtan jáne bort serikteri daýys berdi. Búgin kóptegen týrıster qońyraý shalyp, keletinderi týraly habarlady», - dedi ol.
