Astanalyq turǵyn SQO-da qarýy bar kólikti aıdap áketken
SQO polıtsııa departamenti baspasóz qyzmetiniń málimetinshe, 8 sáýir kúni tańerteń Taıynsha qalasynyń turǵyny «Volkswagen Passat» avtokóligin qoıǵan ornynan tappaǵan. Er adam birden polıtsııaǵa júgindi.
Aıdap áketken avtokólik Taıynshadan shyǵar joldaǵy beınebaqylaý kameralaryna túsip qalǵan eken. Kamera jazbalarynan izdeý baǵyty anyqtaldy. Jedel-izdestirý is-sharalary nátıjesinde «Volkswagen» avtokóligi Lenıngradskoe aýyly mańyndaǵy egistikten tabyldy.
SQO Aqjar aýdanynyń týmasy, qazir Nur-Sultan qalasynda turatyn 33 jastaǵy jigittiń qylmysqa qatysy anyqtaldy. Buryn er adam múliktik qylmys jasaǵany jáne esirtki saýdasy úshin birneshe ret sotty bolǵan. Kúdiktiniń sózine qaraǵanda, ol úıine ketý úshin jolǵa shyǵyp, kólik toqtatpaq bolǵan. Aýlalardyń birinen «Volkswagen» kóligin baıqap, minip ketken. Budan bólek, kólikten pyshaq, «Smersh» pnevmatıkalyq tapanshasymen men oǵy qoldy bolǵan. Urlanǵan zattar alyndy, pyshaq saraptamaǵa jiberildi.
Kúdiktige qatysty «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» jáne «Urlyq» baptary boıynsha tergeý áreketteri júrgizilip jatyr.
«Kólik ıesi mashınany úıdiń syrtynda qulyptamaı, kiltin otaldyrý uıashyǵynda qaldyryp ketken. Kólik ishinde qaldyrylǵan qundy zattar da qylmyskerlerdi áreket jasaýǵa ıtermeleıdi. Jábirlenýshi kólikti aýlada qaldyrsa, aıdap áketý qaýpi de tómen bolar edi. Úı aýlasy jaqsy jaryqtandyrylǵan, bir turǵyn úıge bes kamera bar. Dál osy kameralar aıdap áketken kóliktiń bastapqy qozǵalysyn kórsetti. Qazirgi ýaqytta ýchaskelik polıtsııa ınspektorlary beınekameralardyń qylmystardy ashý men aldyn alýdaǵy tıimdiligin túsindire otyra, halyqpen jumys júrgizýde, turǵyndardyń basym bóligi kameralardy óz qarajatyna ornatyp jatyr», - deıdi Taıynsha aýdany polıtsııa bóliminiń bastyǵy Nurlyjan Aqtanov.
