Astanalyq turǵyn óz-ózin «tonap», 5 mln teńge jymqyrdy

NUR-SULTAN. QazAqparat – Jumys berýshiniń 5 mln teńgesine qyzyqqan elordalyq júrgizýshi tonaý qylmysyn qoldan uıymdastyrǵan, dep habarlaıdy QazAqparat.

Astana turǵyny «102» nómirine habarlasyp, belgisiz adamdardyń ózin qonaq úıdiń janynda pyshaqtap ketkenin málimdegen. Nur-Sultan qalalyq Polıtsııa departamentiniń málimeti boıynsha, «jábirlenýshi» jaýapkershiligi shekteýli seriktestikterdiń birinde júrgizýshi-ekspedıtor bolyp jumys isteıdi. 34 jastaǵy jigittiń aıtýynsha, kólikte otyrǵan kezde «betperde kıgen eki er adam kelip, pyshaqpen qorqytyp, aqsha talap etken».

«Arada tóbeles týyndaǵan-mys. Tonaýshylar júrgizýshiden 5 mln teńgege jýyq aqsha salynǵan dorbany tartyp áketip, izderin sýytqan. Jaralanǵan júrgizýshi qalalyq aýrýhanaǵa jetkizildi», - dep jazady departamenttiń baspasóz qyzmetinen.

«Qylmys jasalǵan» jerdegi beınebaqylaý kameralarynyń bárin teksergen saqshylar jábirlenýshiniń jaraqat alǵan ýaqyty men kúdiktiniń joly túıisken sáttiń aıyrmashylyǵyn baıqap, málimetterdiń shynaıylyǵyna kúmándana bastaıdy.

Polıtsııa júrgizýshiniń sol kúngi qozǵalysyn túgeldeı zerdelep, aqyry páterine tintý júrgizgen eken. Nátıjesinde «tonalǵan» aqsha sol páterden tabylǵan.

«Bultartpas dálelder shyqqannan keıin «jábirlenýshi» qylmysyn moıyndady. Ol aqshany ózi ıemdený úshin tonaýdy qoldan jasaǵanyn rastady. Qazir onyń ústinen kórineý jalǵan aqparat bergeni jáne qylmystyq áreketke barǵany úshin tergeý júrip jatyr», - dep jazylǵan resmı málimette.