Astanalyq túlekterge JOO-da oqý úshin 115 mln teńge áleýmettik kómek tólenedi
«Astana qalasynyń Jumyspen qamtý jáne áleýmettik qorǵaý basqarmasy 1 shildeden bastap 21 tamyzdy qosa alǵanda elordanyń joǵary oqý oryndarynyń kúndizgi bólimderinde oqý úshin áleýmettik kómek alýshylardan qujat qabyldaıdy. «Astana qalasynyń muqtaj sanattaǵy adamdardyń tizbesin anyqtaý, áleýmettik kómek kórsetý jáne mólsherin belgileý erejesiniń» 75-tarmaǵy boıynsha, elordanyń joǵary oqý oryndarynda kúndizgi bólimde oqıtyn mektep túlekteriniń myna sanattaryna: jetim balalarǵa, balalar úıiniń túlekterine, ata-ana qamqorlyǵynsyz qalǵandarǵa, kópbalaly otbasydan shyqqan balalarǵa, onyń ishinde bıyl kámelet jasyna kúndizgi bólimine túskenge deıin kámelet jasyna tolyp qoıǵan úıdiń úlkenderine de áleýmettik kómek beriledi», – dedi Aıgúl Talasova.
Onyń sózinshe, mundaı kómek alatyn balanyń otbasynda jan basyna shaqqandaǵy ortasha tabys eń tómengi kúnkóris deńgeıiniń 4 eselengen mólsherinen aspaý kerek. Muny aqshaǵa shaqsaq, 213 240 teńge degen sóz. Áleýmettik kómek tıisti oqý ornyndaǵy oqý aqysynyń naqty mólsheri kóleminde, bıylǵy jergilikti bıýdjette qarastyrylǵan qarajat sheginde tólenedi. Bıyl elorda bıýdjetinde osy sanatqa jatatyn 185 mektep túlegine áleýmettik kómek berý úshin 115 mln teńge qarastyrylǵan.
