Astanalyq túlekterge «Altyn belgilerdiń» tapsyrylýyna oraı «Qazaq eli» monýmenti alańynda kólik qozǵalysy shekteledi
ASTANA. 20 maýsym. QazAqparat - Elordada búgin, 20 maýsymda saǵat 09.00-den 13.00-ge deıin jáne juma, 21 maýsym kúni saǵat 15.00-den 21.00-ge deıin «Qazaq eli» monýmenti alańynda kólik qozǵalysy shekteledi,
dep habarlady qalalyq ákimdiktiń baspasóz qyzmetinen. Kólik qozǵalysynyń shektelýi qala mektepterin bitirýshilerge «Altyn belgilerdi» tapsyrý saltanatyna baılanysty.
Táýelsizdik dańǵylynda A.Baıtursynuly kóshesinen J.Nájimedenov kóshesine ótýge shekteý qoıylady.
Osy jol bóliginde Táýelsizdik dańǵylymen Qoshqarbaev kóshesi baǵytyna kólikter myna baǵdarmen júredi: Táýelsizdik dańǵylynan - Baıtursynuly kóshesine solǵa burylý - Obaǵan kóshesine ońǵa burylý - Nájimedenov kóshesine ońǵa burylý - sodan Táýelsizdik dańǵylyna solǵa burylyp, Sh.Qaldaıaqov kóshesine shyǵady. Keri baǵytta Sh.Qaldaıaqov kóshesi baǵytynan osy baǵdar qaıtalanady.
Osy baǵdar boıynsha №4, №14, №21 baǵyttaǵy qoǵamdyq kólikter de aınalyp júredi.
Joǵaryda atalǵan saltanatqa qatysýshylar men kelýshilerge kólikterin «Haziret Sultan» meshiti aýmaǵyndaǵy avtoturaqqa qoıý usynylady.
