Astanalyq túlek UBT-nyń arqasynda ǵashyǵyn tapty
Onyń aıtýynsha, UBT bilimdi ǵana teksermeıdi, ǵashyqtardy da tabystyrady.
«Bizge jaqynda Mereı esimdi astanalyq túlek habarlasty. Ol qańtar aıynda «Mega» saýda ortalyǵynda Astanaǵa qonaqqa kelgen Araı esimdi shymkenttik arýmen tanysqan. Biraq, onyń baılanys nómirin alyp úlgermegen jáne Araıdyń bıyl UBT tapsyratynyn bilip, UBT-nyń onlaın translıatsııasy arqyly ony tapty. Súıiktisi synaq tapsyrǵan pýntti anyqtaǵan boıda, Mereı bizge habarlasyp, onyń baılanys nómirin tabýda kómek surady. Kórdińizder me, UBT bilimdi ǵana teksermeıdi, ǵashyqtardy da qosady», - dedi Ramazan Álimqulov Ortalyq kommýnıkatsııalar qyzmetinde ótken baspasóz máslıhatynda.
Ortalyq basshysy astanalyq bozbalanyń tilegin jerge qaldyrmaı, Araıdy izdep jatqandaryn habarlady.
«Bizde qaı aýdıtorııada kimderdiń test tapsyrǵany týraly aqparat bar. TJK, JSN nómirleri qolymyzda. Atalǵan bólimshede Araı esimdi qansha qyzdyń bolǵanyn anyqtaımyz jáne aty-jóni men baılanys nómirin kelisim boıynsha astanalyq jigitke bere alamyz. Bul boıynsha jumys istep jatyrmyz. Jastarǵa sáttilik tileımiz», - dedi ol.
Aıta keteıik, UBT-nyń alǵashqy úsh kúninde Qazaqstandaǵy ortasha ball 83-ti qurady. Eń joǵary nátıje Almaty qalasynda T. Rysqulov atyndaǵy ulttyq ekonomıkalyq ýnıversıtette tirkeldi. Onda almatylyq Hamzın Dáýlet Azatuly 139 ball jınady.
Respýblıka boıynsha 704 mektep bitirýshi 130-139 ball aralyǵynda nátıje kórsetken.
Bıyl respýblıka boıynsha mektep bitirýshilerdiń 70%, ıaǵnı 102 myńy UBT tapsyrady. Mektep bitirgen 147 myń túlektiń basym bóligi UBT-ny qazaq tilinde tapsyrady.
UBT-da jalpy 80 myń suraq bolady. 2018 jylǵa arnalǵan Ulttyq biryńǵaı test suraqtary 50 paıyzǵa jańartylǵan.
Qazaqstandyq mektep bitirýshilerge Ulttyq biryńǵaı testileýden ótýge eki ret múmkindik beriledi. Ekeýinde de qajetti ball jınaı almaǵan balalar JOO-ǵa shartty túrde qabyldanady.
