Astanalyq teatrlar jańa maýsymyn ashty
ASTANA. QazAqparat - Teatr súıer qaýym úshin qýanyshty jańalyq - elordalyq teatrlarda kezekti maýsym ashyldy, dep habarlaıdy Astana qalasy ákimdiginiń resmı saıty.
Q. Qýanyshbaev atyndaǵy memlekettik akademııalyq qazaq mýzykalyq drama teatry HHVIII teatr maýsymyn Muhtar Áýezovtyń «Abaı» dramasymen bastady. Teatr foıesinde arnaıy kórme uıymdastyrylyp, kópshilik nazaryna «Qalıbek Qýanyshbaev teatrynyń» eksponattary usynyldy.
Bıyl Qallekı teatry uly akter, kásipqoı teatr óneriniń negizin qalaýshylardyń biri Qalıbek Qýanyshbaevtyń 125 jyldyǵyn toılaıdy. Kóp jyldan beri teatr ujymynyń repertýaryndaǵy basty shyǵarmanyń «Abaı» dramasynyń bolýy da kezdeısoq emes. Akterdiń ómirinde naq osy uly oıshyldyń rólin somdaý mańyzdy ról atqarǵandyǵy eshkimge de qupııa emes.
Qoıylymnyń rejısseri QR Eńbek sińirgen qaıratkeri Álimbek Orazbekov. QR halyq akteri Tilektes Meıramov pen QR Eńbek sińirgen qaıratkeri Núrken Óteýilov Abaıdyń jas jáne aqsaqaldy shaqtaryn sahnada sheber somdady.
QR halyq artisi Tilektes Meıramov bıyl 70-ke keledi. Akterdiń mereıtoıyna arnaıy «Qardaǵy kógershinniń izi...» qoıylymy qoıyldy, ony Almaty men Qaraǵandy oblysynyń kórermenderi tamashalap úlgerdi.
Spektakl Astanada qarasha aıynda kópshilik nazaryna usynylady dep josparlanǵan. Jańa maýsymda teatr astanalyqtardyń ystyq yqylasyna ıe bolǵan spektaklderden ózge de týyndylardy kórsetpek.
Melpomenanyń kóne hramy - M. Gorkıı atyndaǵy memlekettik akademııalyq orys drama teatry 118-shi teatr maýsymyn «Otets» spektaklimen ashty. Bul qoıylym Maksım Gorkııdiń «Poslednıe» pesasynyń jelisimen qoıylyp, uly orys jazýshysynyń 150 jyldyǵyna arnalady. Qoıýshy-rejısseri - lıtvalyq rejısser Ionas Vaıtkýs. Teatr qyzmetkerleri onymen birneshe jyldan beri jumys istep keledi.
«Oteý» - antraktsyz 4 aktili tragedııalyq balagan janryndaǵy spektakl. Shyǵarmada qazirgi zamanǵy qoǵamdaǵy otbasynyń róli men statýsy taqyryby kóteriledi. Gorkıı teatry qonaqtaryn jańa maýsymda ádettegideı klassıkalyq mýzykamen, tátti-dámdilermen qarsy aldy. Artıster men kórermender arasynda jyly qarym-qatynas ornady. Sonymen qatar, shara aıasynda teatrdyń bas qoıýshy-sýretshisi Qanat Maqsutovtyń jáne grımer Darııash Qasymovanyń eńbekteriniń kórmesi uıymdastyryldy.
«Jastar» teatry 20 qazanda ótetin HІІ teatr maýsymynyń ashylýyna daıyndyq ústinde. Bul kúni kórermender Ǵabıt Músirepovtyń qazaq halqynyń eń tanymal ǵashyqtar jyry Tólegen men Jibektiń mahabbaty týraly «Mahabbat týraly ańyz» mıýzıklin tamashalaıdy. Evgenıı Brýsılovskııdiń zamanaýı óńdelgen klassıkalyq mýzykasy QR Eńbek sińirgen qaıratkeri, rejısser Nurqanat Jaqypbaıdyń qoıylymynda jańasha oryndalady.
Jastar teatrynyń mıýzıkli Ońtústik Koreıada Tegý mádenı ortalyǵynda HІІ halyqaralyq festıvalde arnaıy dıplom alǵannan keıin kópshilikke tanymal boldy. Munymen qosa, Qazaqstannyń halyq artisi, rejısser, teatrdyń eńbek sińirgen akteri R.Seıitmetovtyń 80 jyldyǵyna arnalǵan qazaqstandyq drama teatrlarynyń festıvalinde «Mahabbat týraly ańyz» «Úzdik spektakl» nomınatsııasynda Gran-prı jeńip aldy.
