Astanalyq teatr Oralhan Bókeı shyǵarmalaryn sahnalaıdy
ASTANA. QazAqparat - Astanadaǵy Q. Qýanyshbaev atyndaǵy Memlekettik akademııalyq qazaq mýzykalyq drama teatry XXVII maýsymyn japty, dep habarlaıdy QazAqparat tilshisi.
Ádette, Qallekı teatry jańa maýsymdy «Abaı» tragedııasymen ashyp, ony osy qoıylymmen jabýdy dástúrge aınaldyrǵan. Sebebi, Abaı - teatrǵa esimi berilgen Qalıbek Qýanyshbaev shyǵarmashylyǵyndaǵy shoqtyǵy bıik ról edi. Bul joly teatr maýsymy Bolat Uzaqov rejısserlik etken «Shámshi» elegııasymen jabyldy.
«Shámshi qazaq halqynyń súıikti kompozıtory. Halyq bul spektakldi súıedi. «Shámshi» qoıylatyn kúni bıletter onlaın túrde tez satylyp ketedi. Onyń ústine «Shámshi» elegııasy - XXVII teatr maýsymynda kórermender nazaryna usynylǵan alǵashqy premera. Sondyqtan, dál osy spektaklmen maýsymdy jabýdy uıǵardyq», - dep túsindirdi Q. Qýanyshbaev atyndaǵy Memlekettik akademııalyq qazaq mýzykalyq drama teatrynyń jetekshisi Aıbolat Seksembaev.
Teatr basshysy XXVII teatr maýsymynda kórermenge jol tartqan jańa qoıylymdardy atap ótti.
«Bul maýsym ujym úshin óte tabysty boldy. Jeltoqsan aıynda «Shámshi» elegııasynyń premerasyn usyndyq. Sáýir aıynda Astana qalasynyń 20 jyldyǵyna oraı Talǵat Temenov sahnalaǵan Ýılıam Shekspırdiń «Otellosy» qoıyldy. Maýsym aıynda da Astananyń 20 jyldyǵyna arnap, Ken Kızıdiń «7+1» psıhologııalyq dramasyn qazaq tilinde sóılettik. Kelesi maýsymda Oralhan Bókeıdiń shyǵarmalaryn jáne sheteldik klassıkalyq shyǵarmalardyń birin sahnalaýdy josparlap otyrmyz», - dedi ol.
Aıta keteıik, teatrdyń jańa maýsymy 2018 jyldyń qyrkúıek aıynda ashylady. Elordalyq kórermender úshin teatr maýsymy aıaqtalǵanymen, Qallekı ujymy elordanyń 20 jyldyǵyna arnalǵan Astana qalasynyń mádenı kúnderi aıasynda gastroldik saparyn jalǵastyrady.
Atap aıtqanda, 18 shilde kúni Semeı qalasynyń turǵyndary nazaryna, 19-20 shilde kúnderi Óskemen qalasyndaǵy kórermenderge Ulyqbek Esdáýlet pen Nurqanat Jaqypbaıdyń «Zere» qoıylymy, M. Áýezov pen Á.Orazbekovtyń «Abaı» qoıylymdary usynylady.
