Astanalyq tártip saqshylary jeltoqsannyń 31-i men qańtardyń 4-i aralyǵynda kúsheıtilgen qyzmetke kirisedi
ASTANA. Jeltoqsannyń 29-y. QazAqparat /Aıdar Ospanalıev/ - Astanalyq tártip saqshylary jeltoqsannyń 31-i men qańtardyń 4-i aralyǵynda kúsheıtilgen qyzmetke kirisedi. Qazirgi tańda qalalyq Іshki ister departamentiniń basshylarynan jaýapty azamattar bekitildi.
Bul týraly búgin jýrnalıstermen bolǵan baspasóz máslıhatynda Astana qalalyq Іshki ister departamentiniń Qoǵamdyq qaýipsizdik basqarmasynyń bastyǵy Batyrlan Esenbaı málim etti, dep habarlaıdy QazAqparat.
Onyń sózine qaraǵanda, qaladaǵy tártipti nyǵaıtýǵa 1 myń 500 tártip saqshysy men 200 avtokólik jáne 110 áskerı qyzmetkerler men qoǵam ókilderi tartylǵan. Adamdar kóp jınalatyn oryndar men merekelik sharalar uıymdastyrylatyn jerlerde polıtsııa kezekshilikteri nyǵaıtylyp, olar kezekshilikti kúndiz-túni júrgizedi. «Osy ýaqytta barlyq kóńil kóteretin oryndarda ujymdyq merekelik sharalar uıymdastyryla bastady. Osyǵan qaraı qalada taǵy qosymsha 42 baǵyt nazarǵa alyndy. Al shaharda oryn alýy yqtımal quqyq buzýshylyqtar men zań buzýshylyqtarǵa der kezinde shara qoldaný úshin aýdandyq ishki ister basqarmalarynda qosymsha jedel-tergeý toptary quryldy. Sondaı-aq jańa jyldyq merekeler uıymdastyrylyp jatqan mektepterdegi tártipke de barynsha kóńil bólinip otyr. Onda mektep ınspektorlary men tártip saqshylarynan arnaıy kezekshilik uıymdastyrylyp, merekelik sharanyń uıymdastyrylýy baqylaýǵa alyndy», dedi basqarma bastyǵy.
