Astanalyq tártip saqshylary beınebaqylaý júıesiniń kómegimen qylmystyń aldyn aldy
ASTANA. 20 aqpan. QazAqparat - Astanalyq tártip saqshylary beınebaqylaý júıesiniń kómegimen qaladaǵy eskertkishterdi bólshektep, túrli-tústi metalldarǵa ótkizip júrgen qylmyskerlerdi ustady.
Bul týraly búgin osy máselege baılanysty jýrnalıstermen bolǵan brıfıngte «Esil» aýdandyq ishki ister basqarmasynyń tergeý bóliminiń bastyǵy Mádı Oljabaev málim etti.
Onyń sózine qaraǵanda, oqıǵa 16 aqpan kúni elordadaǵy «Araı» saıabaǵynda túngi saǵat 2.40 shamasynda oryn aldy. Jedel basqarý ortalyǵynyń beınebaqylaý operatory saıabaq mańynan eki kúdikti azamatty baıqap qalyp, ol jerge «Tobyl-13» sholǵynshy polıtsııa jasaǵyn jiberedi. Polıtsııa qyzmetkerleri 1988 jyly týǵan E. jáne 1991 jylǵy B. esimdi Aqmola jáne Jambyl oblystarynyń jumyssyz turǵyndaryn ustap, olardy tintý barysynda temir kesýge arnalǵan qaıshyny tapty.
Tekserý barysynda málim bolǵanyndaı, urylar saıabaqqa kireberiste ornalasqan kompozıtsııanyń bólshekterin kesken.
«Sonymen qatar bul ustalǵan azamattardyń alǵashqy urlyqtary emes ekendigi anyqtalyp otyr. Olar túngi ýaqytta «Araı» saıabaǵyna kelip, eskertkishterdiń bólshekterin kesip alyp ketip júrgen. Kesilgen metall bólshekterin olar taksıge tıep, metall qabyldaıtyn oryndarǵa ótkizip otyrǵan. Qazirgi tańda osy áreketterdiń saldarynan memleketke kelgen shyǵyn kólemi anyqtalýda. Sonymen qatar ustalǵan azamattardyń metall bólshekterin qaıda ótkizgendikteri de tekserilýde. Bul fakt boıynsha Qylmystyq Kodekstiń 175 babynyń 3-inshi tarmaǵy boıynsha qylmystyq is qozǵaldy. Osy ýaqytta tergeý amaldary júrip jatyr.
