Astanalyq sur mergender sadaq atýdan jarysqa tústi
ASTANA. 24 jeltoqsan. QazAqparat - 19-22 jeltoqsan kúnderi aralyǵynda elordada sadaq atýdan «Astana Kýbogi» dástúrli jarysy ótti.
Astana qalalyq Týrızm, dene tárbıesi jáne sport basqarmasynyń baspasóz qyzmetinen habarlaǵandaı, sur mergender olımpıadalyq jáne qosymsha dıstantsııalarda anyqtaldy. Olımpıadalyq aınalymda eki kvalıfıkatsııalyq kezeńnen súrinbeı ótip, elorda qurama komandasynyń kóshbasshylarynyń biri Olga Krıvets basty júldege jáne qosymsha 25 metrlik shaqyrymda jeńiske qol jetkizdi. Ekinshi oryn Adelıa Voronovaǵa jáne úshinshi oryn Laýra Asaınovalarǵa buıyrdy.
Erler arasynda olımpıadalyq aınalymda Aldııar Sadyqov top jarsa, ekinshi men úshinshi oryn sáıkesinshe Akım Shevchenko men Sultanbek Jeńisovke berildi. 25 metrlik dıstantsııada birinshi orynǵa Akım Shevchenko qol jetkizdi.
Sadaq atýdyń ekinshi túri - kompaýndta qyzdar men erler birge kúsh synasyp, qyzdardyń mergendigi áldeqaıda joǵary dárejede bolǵandyǵy anyqtaldy. Basty jarysta Lıýbov Krıvets altyn júldege qol jetkizse, ekinshi orynǵa Bıbigúl Іzbasarova, úshinshi orynǵa Elaman Jaqabaev jaıǵasty. 25 metrlik kompaýndta qyzdar ózderi arasynda oryn almastyryp, birinshi oryndy endi Bıbigúl jeńip, L.Krıvets ekinshi orynǵa tústi. Qola júlde - Mıras Álseıtovte.
Merekelik demalystan keıin, elordanyń mergenderi qaıta jattyǵý jumystarǵa kirispek. Sadaq atýdan keler jyldaǵy alǵashqy sóre - Qazaqstan chempıonaty aqpan aıynda Temirtaý qalasynda ótkiziledi dep josparlanýda.
