Astanalyq stýdent sý únemdeıtin ozyq tehnologııa oılap shyǵardy
ASTANA.QazAqparat - Elordadaǵy Qazaq gýmanıtarlyq zań ýnıversıtetiniń stýdenti Qýanysh Ózbekov dárethana sýyn únemdeıtin tehnologııa jobasyn oılap shyǵardy, dep habarlaıdy «QazAqparat»HAA tilshisi.
Búgin Astanada Hakaton - ónertapqyshtardyń forýmy bastaldy. Zamannyń ozyq oıly jastarynyń saıysy 2 kúnge sozylmaq. Oǵan qatysýshylarǵa 48 saǵattyń ishinde qalanyń áleýmettik máselelerin sheshý tapsyrmasy júktelgen. Top-top bolyp bólingen qatysýshylarǵa atap aıtqanda, kúndelikti tutynatyn sýdy únemdeý, qoqystardy bólý arqyly olardy óńdep paıdaǵa jaratý, qurylys materıaldary naryǵyndaǵy jumystardy jeńildetý sekildi noý-haý oılastyryp shyǵarý tapsyrmasy berilgen.
Forýmǵa astanalyq 17 jastaǵy stýdent Qýanysh Ózbekov te qatysýda. Ol «Toilet Tank bank» jobasyn ákelgen. Aıtýynsha, atalǵan joba arqyly Astanada jylyna mıllıardtaǵan lıtr sýdy únemdeýge bolady.
«Meniń ıdeıamAstana qalasyndaǵy sýdy únemdeýge baǵyttalǵan. Bul joba eń aldymen dárethanadaǵy sýdy únemdeýge arnalady. Sebebi, bizdiń esepteýimiz boıynsha úıdegi sýdy eń kóp tutynatyn oryn ájethana bolyp otyr. Máselen, bir rettik sýdy aǵyzǵanda 6-7 lıtr sý ketedi. Al shyn máninde oǵan 4-5 lıtr sý qajet. Al qalǵan 2 lıtr dalaǵa ketip jatyr. 2 lıtr sýdyń mólsheri az bolyp kórinýi múmkin, biraq halqy1 mıllıonǵa jetken Astanadaǵy ár úıden 2 lıtr sý artyq ketip jatsa, bunyń ózi qanshama shyǵyn ekenin esepteı berińiz. Kúnine adam ájethanaǵa 3-4 ret barady. Osyny eskerseńiz, kúnine mıllıondaǵan lıtr sý tekke ketip jatyr. Eger de osy tehnologııany engizsek, halyqtyń jáne memlekettiń aqshasy únemdeler edi. Dárethananyń sý saqtalatyn qurylǵynyń ishine qoıylatyn shaǵyn qaptyń baǵasy bar-joǵy 260 teńge. Demek, tehnologııa nebári 1 aıda ózin-ózi aqtaıdy», - deıdi stýdent.
Qýanyshtyń aıtýynsha, atalǵan jobaǵa qytaılyq kompanııa qyzyǵýshylyq tanytyp otyr eken. Qazirgi tańda bul tehnologııanyń analogy AQSh pen Izraıl elderinde qoldanylady.
«Solardyń tájirıbesine súıenip, AQSh-taǵy áriptestermen sóılestim. Olar da men sekildi jas jigitter. Patent alý jaǵynan kelispeýshilik bolmaıdy. Kelesi aıda patentti alaıyn dep jatyrmyn. Astana qalasynyń ákimdigine bul ıdeıa unap otyr. Qala halqynyń sany jyl sanap ósip jatqandyqtan, sýdy únemdeý máselesi ózekti degen oıdamyn», - deıdi Qýanysh Ózbekov.
