Astanalyq stýdent Estaı Berkimbaev atyndaǵy respýblıkalyq án baıqaýynyń jeńimpazy atandy
ASTANA. QazAqparat - Pavlodarda ótken Estaı Berkimbaev atyndaǵy besinshi respýblıkalyq án baıqaýynyń bas júldesin astanalyq Ózgeris Sherikbaı jeńip aldy.
Dástúrli án óneri ókilderiniń basyn qosqan óner báıgesi oblys ákiminiń qoldaýymen jáne oblystyq mádenıet basqarmasynyń uıymdastyrýymen ótti, dep habarlaıdy pavlodarnews.
"Shańyraq" oblystyq halyq shyǵarmashylyǵy ortalyǵy mamandarynyń aıtýynsha, baıqaýǵa elimizdiń ár túkpirinen 30-daı jas ánshi qatysyp, qazaqtyń dástúrli óner mektebiniń qandaı deńgeıde ekenin taǵy bir márte pash etti. - Qatysýshylar Estaı ánderin shyrqaýmen ǵana shektelgen joq. Sonymen birge ulttyq óner sańlaqtary Aqan seri, Birjan sal, Jaıaý Musa, Balýan Sholaq, Úkili Ybyraı, Jarylǵapberdi, Muhıt, Maıra ánderi men qazaqtyń halyq ánderin de naqyshyna keltire oryndady. Úsh kúnge sozylǵan óner báıgesi Aqtoǵaı aýdandyq mádenıet úıinde qorytyndylandy. Ónerpazdar Estaı aýylyndaǵy Estaı kesenesiniń basyna baryp, babamyzdyń rýhyna taǵzym etti, - deıdi Amankeldi Ábdiqadyruly.
Baıqaý qorytyndysy boıynsha, astanalyq jas ónerpaz Ózgeris Sherikbaı bas júldeni qanjyǵalasa, Soltústik Qazaqstan oblysynan kelgen Oljas Suraǵanov birinshi oryndy enshiledi. Al elordanyń taǵy bir ánshisi Asqar Muqııat, Abaı jerinen kelgen Tańat Muqashev ekinshi jáne almatylyq qos ánshi Nurbolat Isaev, Nurbol Muhıt, elordalyq Aıaýlym Qamajan úshinshi oryndy qanaǵat tutty.
