Astanalyq sportshylarǵa beriletin syıaqy kólemi artty
NUR-SULTAN. QazAqparat – Elorda sportshylaryna beriletin syıaqy kólemi ósti. Odan bólek, sportshylardy jattyqtyrýshy mamandardyń jalaqysy artpaq.
Bul týraly Nur-Sultan qalasy Dene shynyqtyrý jáne sport basqarmasynyń basshysy Samat Erǵalıev málim etti, dep habarlaıdy QazAqparat tilshisi.
«Ótken jyl eldegi pandemııaǵa qaramastan elorda sportshylary úshin tabysty boldy. Sportshylarǵa beriletin syıaqy mólsheri ulǵaıyp, ony alatyndardyń sany 84-ten 170-ke deıin artty. Naqtyraq aıtsaq, Olımpıada oıyndarynyń jeńimpazyna buryn 97 334 teńge syıaqy berilse, qazir onyń kólemi 694 500 teńgege deıin ósti. Álem chempıony atanǵan sportshy 93 794 teńge syıaqy alsa, búginde ol 277 800 teńgege deıin artty. Al Azııa Chempıonatynyń syıaqy mólsheri 83 176 teńgeden 222 240 teńgege deıin ulǵaıdy. Tıisinshe QR Chempıonatynda júldeger atanǵan sportshy buryn 79 637 teńge syıaqy ıelense, qazirgi ýaqytta jeńimpazǵa 166 680 teńge kóleminde syıaqy beriledi», - dedi Samat Erǵalıev.
Sondaı-aq, basqarma basshysy jattyqtyrýshylardyń da jalaqysy 2024 jylǵa deıin 25 paıyzǵa ósetinin aıtty.
«Joǵaryda atalǵan ózgerister nátıjesinde Olımpıadalyq jáne Olımpıadalyq emes sport túrlerin damytý dırektsııalarynyń quzyreti artady jáne elorda qurama komandalarynyń sporttyq básekeler men halyqaralyq dodalarǵa daıyndyq jumysy tıisti deńgeıde uıymdastyrylatyn bolady. Sondaı-aq, bıyldan bastap elordalyq sportshylardyń issaparyna bólinetin qarajat qolma-qol aqshamen emes, tikeleı sportshylardyń jeke shottaryna aýdarylatyn boldy», - deıdi ol.
Aıta ketsek, buǵan deıin astanalyq balalar men jasóspirimderdiń sportpen tegin túrde shuǵyldana alatyndyǵy habarlanǵan bolatyn.
Sondaı-aq, Samat Erǵalıev Nur-Sultanda bıyl ashylǵan sporttyq nysandardyń jumysymen tanystyrdy.
Odan bólek, elordada sporttyq-medıtsınalyq ortalyqtyń ashylatyny aıtyldy.
