Astanalyq sportshylar Koreıanyń olımpıadalyq bazasynda boldy
ASTANA. 24 qańtar. QazAqparat - XXIII qysqy Olımpıadalyq oıyndarynyń astanasy Phenchhan (Koreıa Respýblıkasy) qalasynda osy dúbirli is-sharany uıymdastyrýshylar 2004 jyldan beri álemniń túkpir-túkpirinen jas sportshylardy qabyldaýdy dástúrge aınaldyrǵan. 20-dan astam memleketten kelgen sportshylarmen birge Dream program-2013-ke qatysý úshin Astananyń da sportshylary shaqyryldy. Bıylǵy jyly Phenchhannyń olımpıadalyq bazasyna short-trekpen aınalysýshy jasóspirimder attandyryldy, dep habarlady Astana qalasynyń resmı saıty týrızm, dene shynyqtyrý jáne sport basqarmasynyń baspasóz qyzmetine silteme jasap.
12 jasar Danııar Serikbaı, 13 jasar Baıjan Beksultan jáne Ádil Kúmisbekov osy sport túrimen aınalysqandaryna tek bir jyl ǵana bolsa da, respýblıkalyq deńgeıde ótken alǵashqy jarystar da júldeli oryndardy ıelendi. Jas talanttar Astana qalasyndaǵy №2 BJSM-niń eń úzdik bapkeri retinde tanylǵan Ásel Qameshovada jattyǵady.
Birikken oqý-jattyǵý jıynyna qatysqan jasóspirim sportshylar aldaǵy Olımpıadalyq oıyndarǵa qatysýy múmkin.
Sportshylar Vankýver Olımpıadasynyń kúmis júldegeri, álem rekordsmeni ońtústikkoreıalyq Sýng Sı-Bak ótkizetin master-klasstarǵa qatysyp, tájirıbe jınaqtady.
«Bul balalar úshin ǵana emes, barlyq qatysýshy bapkerler úshin de úlken tájirıbe boldy», - dep pikirin bildiredi Ásel Qameshova. - Іs-sharanyń uıymdastyrylýy óte joǵary deńgeıde ótti. Sportshylarǵa da aıyryqsha kóńil bólindi».
Baǵdarlama sońynda qatysýshy memleketter arasynda úzdik sportshylardy anyqtaýǵa múmkindik bergen kezdesý oıyny ótkizildi. Jarystyń qorytyndysy boıynsha, Danııar Serikbaı 4-shi oryn alyp, Beksultan Baıjan úzdik short-trekshilerdiń bestigine endi. Bul jerde qazaqstandyq sportshylardyń óz qarsylastarynan kem degende bir jas kishiligin de eskergen jón.
Sportshylar Astanaǵa oralyp, jattyǵý jumystaryna bar yntasymen kirisip ketti. Alda QR mektep oqýshylarynyń Spartakıadasy tur. Olardyń árqaısysy Phenchhanǵa resmı oıyndarǵa qaıtyp oralýǵa bekem bel býǵandaı.
