Astanalyq sportshy qalyńdyǵyna jarys ústinde sóz saldy
ÓSKEMEN. QazAqparat - Óskemende órt sóndirý qutqarý sportynan ótken qysqy chempıonattyń marapattaý saltanatynda astanalyq jigit qalyńdyǵyna sóz saldy, dep habarlaıdy QazAqparat tilshisi.
ShQO tótenshe jaǵdaılar departamentiniń baspasóz qyzmetiniń habarlaýynsha, mundaı oqıǵany eshkim kútpegen. Órt sóndirý qutqarý sportynyń qysqy chempıonaty máresine jetip, jeńimpazdardy marapattaý sharasy ótip jatqan. Astana qalasynyń namysyn qorǵap kelgen Marat Salıkov 300-den astam sportshynyń aldynda qalyńdyǵy Gaýhar Qarmanovaǵa sóz saldy.
«24 jastaǵy Marat atalmysh sport túrinen Qazaqstan qurama komandasynda da óner kórsetedi. Al Gaýhar Almaty qalasynyń namysyn qorǵap kelgen. Ol da ulttyq qurama múshesi. Jastar 2 jyl buryn Astanadaǵy jıynda tanysypty» - delingen baspasóz qyzmeti taratqan aqparatta.
«Ǵashyqtyq qashyqtyqqa qaramaıdy eken. Ony óz basymyzdan ótkerdik. Jarystardyń arqasynda jıi kezdesip turdyq. Al eńbek demalysy kezinde bir-birimizge qonaqqa kelip júrdik» - deıdi Marat Salıkov.
Jas jubaılar úılenýge asyqpaıtyndaryn aıtady. Toıdy sport maýsymy aıaqtalǵan soń, kúzge qaraı jasamaqshy.
