Astanalyq sportshy armrestlıngten eki dúrkin álem chempıony atandy
ASTANA. QazAqparat - Túrkııada armrestlıngten ótken Álem chempıonatynda astanalyq Erkin Álimjanov eki altyn jeńip alyp, eki dúrkin álem chempıony atandy, dep habarlaıdy QazAqparat.
Astana qalasy mádenıet jáne sport basqarmasynyń málimetinshe, «Jiger» sport klýbynyń tárbıelenýshisi halyqaralyq dodada ardagerler arasynda 75 kg salmaq sanatynda óner kórsetip, oń jáne sol qolmen kúsh synasýda birinshi oryn aldy.
Armrestlıngten Álem chempıonatynda Qazaqstan quramasynyń sapynda Astanadan «Tolaǵaı» sport mektebiniń sportshylary da óner kórsetti. Olar qazaqstandyq komandanyń qorjynyna tórt júlde saldy - 2 altyn, bir kúmis jáne bir qola. QR eńbek sińirgen sport sheberi Georgıı Dzeranov 100 kg salmaq sanatynda sol qolmen kúreste birinshi oryn aldy. QR halyqaralyq sanattaǵy sport sheberi Álimjan Muratov 80 kg salmaq sanatynda sol qolmen kúreste birinshi oryn, oń qolmen kúreste ekinshi oryn aldy.
QR Sport sheberi Arman Rahmanqulov 85 kg salmaq sanatynda oń qolmen kúreste qola júldeni qanaǵat tutty.
Armrestlıngten Álem chempıonaty Túrkııanyń Antalıa qalasynda 12-21 qazanda ótti. Jarysta álemniń 40-tan astam memleketinen 1300 tarta sportshy básekege tústi.
Týrnırde eń úzdik nátıje kórsetken Qazaqstan quramasy jastar arasynda jalpykomandalyq esepte birinshi jáne eresekter arasynda ekinshi oryn aldy.
