Astanalyq sheneýnikter jemqorlyqqa qarsy jadynamaǵa qol qoıýǵa mindetteledi
ASTANA. QazAqparat - Elordadaǵy barlyq memlekettik mekemelerdiń basshylary osy jyldyń ekinshi toqsanynda jeke jaýapkershilik jadynamasyna qol qoıatyn bolady. Bul týraly búgin QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalalyq departamenti dırektorynyń orynbasary Jazıra Jylqyshıeva aıtty, dep habarlaıdy QazAqparat.
«Astana adaldyq alańy» jobasy bıylǵy jyldyń 7 aqpanynan bastap iske asyrylýda. Bul QR Memlekettik qyzmet isteri jáne sybaılas jemqorlyqqa qarsy is-qımyl agenttigi men Astana qalasy ákimdiginiń birlesken jobasy. Onyń maqsaty - qalany qolaıly ortaǵa aınaldyrý, ákimshilik kedergilerdi joıý, naqty aıtqanda turmystyq jemqorlyqty boldyrmaý. Ol 7 baǵyt boıynsha iske asyrylyp jatyr», - dedi ol elorda ákimdiginde ótken semınar barysynda.
Onyń aıtýynsha, ár baǵyt boıynsha jumys toptary qurylyp, bir aıdyń ishinde birqatar ister atqarylǵan. Máselen, elordanyń barlyq emhanalarynda azamattarǵa qolaıly orta qalyptastyrý maqsatynda elektrondy kezekti engizý jáne turǵyndardyń elektrondy densaýlyq kartasyn jasaý jumystary júrgizilýde. Quqyq qorǵaý organdarynda da halyqqa qyzmet kórsetýdiń ashyqtyǵyn qamtamasyz etý baǵytynda birshama jumystar atqarylǵan.
«Sonymen qatar birinshi basshylardyń jaýapkershiligin arttyrý úshin de jumystar júrgizildi. Jumys toptary basshynyń jeke jaýapkershiligi jónindegi arnaıy jadynama ázirlep, qoǵam talqylaýyna usyndy. 16 naýryz kúni atalǵan máselege oraı qoǵamdyq talqylaý ótedi. Al ekinshi toqsannan bastap árbir memlekettik organnyń birinshi basshysy oǵan qol qoıady. Osylaısha, mekeme ishinde sybaılas jemqorlyqqa qarsy jumystar júrgizilmese nemese tıisti deńgeıde atqarylmasa, onda onyń jaýapkershiligin arttyratyn qujat daıyn bolady», - dedi ol.
J.Jylqyshıevanyń sózine qaraǵanda, qujatta memlekettik qyzmetterdi alý protsesterin avtomattandyrý, jurtshylyqpen júıeli kezdesýler ótkizý, qyzmetkerler syıaqylarynyń jarııalylyǵyn qamtamasyz etý, kásibı qyzmettiń ashyqtyǵy syndy máselelerde birinshi basshynyń jaýapkershiligi kúsheıtiledi.
Aıta keteıik, semınardy QR Memlekettik qyzmet isteri jáne sybaılas jemqorlyqqa qarsy is-qımyl agenttigi Astana qalasy ákimdigimen birlesip, memlekettik qyzmetshilerdiń ádep deńgeıin kóterý, kórsetiletin memlekettik qyzmetterdiń sapasyn arttyrý maqsatynda pikirtalas túrinde ótkizgen bolatyn.
