Astanalyq saıabaqta zamanaýı haýyzdar ashyldy
ASTANA. QazAqparat - Astanalyq saıabaqtaǵy «Oazıs» jaǵajaı klýbynda ýaqytty qyzyqty ótkizýge bolady. Keshende ashyq basseınder, SPA-vanna, jazǵy dámhana, voleıbol oınaıtyn alań, tramplınder, syrǵanaqtar men sýburqaqtar ornalasqan. Kún jyly bolǵanda munda júzge jýyq qala turǵyny men qonaqtary demalady.
Qalalyq ákimdik baspasóz qyzmetiniń habarlaýynsha, jaǵajaı klýby Astanalyq saıabaqty qaıta jóndeý aıasynda ashyldy.
- Keshen qajetti ári paıdaly bolyp shyqty. Astanada jazda kez kelgen otbasy demalysqa bara bermeıdi, al munda jaqsy demalýǵa bolady, keshen ınfraqurylymy álemdik shıpajaılardaǵy qonaq úılerden esh kem emes, - deıdi Astanalyq saıabaq basqarýshysy Ǵanı Hasenov.
«Oazıs» kesheni kún saıyn saǵat 11-den keshki 21.00-ge deıin jumys isteıdi.
Keshen aýmaǵynda úsh bólikten turatyn (jalpy, balalarǵa arnalǵan jáne SPA-vanna) sýy jylytylatyn basseın, sondaı-aq, álemdik standarttarmen jasalǵan sporttyq basseın ornalasqan. Sý udaıy súzgiden ótkizilip otyrady. Sonymen qatar, kúnde tańerteń basseınder arnaıy sý elektr shańsorǵyshtarmen tazartylady.
Demalýshylar ashyq aspan astynda voleıbol alańynda kúsh synasady. Aınaladaǵy kúrkeler men jazǵy dámhanalardan salqyn sýsyndar alyp, júrek jalǵaýǵa bolady. Tamaqty ózińmen birge ala kelýge de tyıym salynbaǵan. Kishkentaı astanalyqtar men qala qonaqtary syrǵanaqtarǵa shyǵyp, sýburqaqtarda oınap, kóńil kóteredi.
Eresekter úshin jaǵajaıǵa kirý bıletiniń quny - 5000 teńge, balalar úshin - 3000 teńge, 3 jasqa deıingi balalar úshin kirý tegin. Dúısenbi kúnderi halyqtyń áleýmettik osal toptary klýbqa tegin kiredi.
