«Astanalyq» saıabaq TMD boıynsha úzdik atandy
Sochı qalasynda ótken XV «Hrýstalnoe koleso» baıqaýynda qalalyq saıabaq osyndaı qurmetti ataqqa ıe boldy. Atalmysh baıqaý barysynda jyl saıyn oıyn-saýyq pen demalys ındýstrııasyndaǵy kóshbasshylar anyqtalady.
Jalpy baıqaýǵa 162 saıabaq qatysty. «Astanalyq» saıabaq jeńip shyqqan «Kelýshiler sany jylyna 500 myńnan - 1 mln adamǵa deıin jetetin úzdikashyq oıyn-saýyq saıabaǵy» nomınatsııasy eń iri atalym.
TMD aýmaǵynda 2014 jyly qysqy Olımpıada oıyndary qarsańynda ashylǵan Sochı-saıabaǵynan basqa barlyq saıabaqtar osy sanatqa jatady. Úzdik saıabaq ataǵy úshin Máskeý, Sankt-Peterbýrg, Mınsk, Tbılısı jáne basqa da iri qalalardyń saıabaqtary talasty.
TMD aýmaǵyndaǵy úzdik ashyq oıyn-saýyq saıabaǵy ataný - úlken qurmet. «Astanalyq» saıabaqtyń buǵan óziniń kópfýnktsıonaldylyǵynyń arqasynda qol jetkizip otyrǵandyǵyn atap ótti. Saıabaqta attraktsıondardan basqa qalalyq jaǵajaı, ashyq basseın aımaǵy, sportpen shuǵyldanýǵa arnalǵan shańǵy-rollerlik trassa bar. Munymen qosa, jaz boıy kún saıyn «Saıabaqtyń 7 ǵajaıyby» oıyn-saýyq sharasy men apta saıyn jeksenbi kúnderi «Fitness Park Astana» jattyǵýlary ótkizildi.
«Astanalyq» saıabaqtyń TMD aýmaǵynda úzdik dep tanylýy Memleket basshysy Nursultan Nazarbaev alǵa qoıǵan Qazaqstandy mádenıet salasyndaǵy jetistikteri arqyly tanymal etý syndy maqsatqa qol jetkizýdiń belgisi. Elbasy «Bolashaqqa baǵdar: rýhanı jańǵyrý» atty baǵdarlamalyq maqalasynda mádenıet pen jańǵyrý arqyly ulttyq sanany keńeıtýge erekshe nazar aýdarady. Bul elordadaǵy mádenı-buqaralyq demalys oryndaryn damytý jolyndaǵy kóp jyldyq qajyrly eńbektiń nátıjesi. Bul elimizdegi saıabaqtarǵa qatysty osyndaı iri alǵashqy marapat jáne ony Astananyń 20 jyldyǵyna arnaımyz», - dedi Astana qalasynyń mádenıet, muraǵattar jáne qujattama basqarmasynyń basshysy Bolat Majaǵulov.
Baıqaý forým formatynda ótti. Tórt kún boıy túrli memleketterdiń oıyn-saýyq ındýstrııasynyń ókilderi ózara tájirıbe bólisip, oqytý semınarlaryna qatysty. Shara Reseıdegi eń iri jáne TMD aýmaǵyndaǵy jyl saıyn kelýshiler sany 1 mln adamnan asatyn saıabaq sanalatyn Sochı-saıabaǵynyń aýmaǵynda ótti.
