Astanalyq saıabaq alǵash ret qysta jumys isteıdi
ASTANA. QazAqparat - Astanalyq saıabaqta alǵash ret elorda turǵyndary men qonaqtaryna arnalǵan oıyn-saýyqtar men qysqy demalys uıymdastyrylady, dep habarlaıdy QazAqparat elorda ákimdiginiń medıa ortalyǵyna silteme jasap.
Astanalyq saıabaq - qaladaǵy eń eski jáne turǵyndardyń súıikti oryndarynyń biri. Sol sebepti, munda qyzyqty demalysty unatatyndar úshin úlken muz aıdyny, bıik syrǵanaq pen «Bubble tab» qysqy attraktsıony jasaldy. Balalardyń júregin jaýlap úlgergen attraktsıon alǵash ret byltyr ashylǵan bolatyn.
«Saıabaqtaǵy syrǵanaqtyń bıiktigi - 4 metr, al syrǵanaý joly 50 metrden asady. Muz aıdynynyń kólemi - 600 sharshy metr, aınalasynda aǵashtar bar, keshki jáne túngi ýaqytta jaryq berilip, keremet romantıkalyq atmosfera syılaıdy», - dep málim etti qalalyq mádenıet, muraǵattar jáne qujattama basqarmasy.
Astanalyq saıabaqtyń basty artyqshylyǵy - úlken aǵashtar, bul qaladan tys demalys sezimin beredi, sondaı-aq jelden qorǵaıdy. Nátıjesinde muz aıdynyn jaıly ári yńǵaıly etedi.
Muz aıdyny men syrǵanaq - kelýshiler úshin tegin. Sonymen qosa, konkı, tıýbıng jáne shanany jalǵa berý orny, statsıonarlyq dámhana men meıramhana jumys isteıdi. Astanalyq saıabaq elorda turǵyndary men qonaqtaryn asyǵa kútedi.
