Astanalyq sarbaz gıtaramen Abaıdyń ánin oryndady
ASTANA. QazAqparat - Astana qalasyndaǵy Beıbitshilik kóshesiniń boıynda ornalasqan Abaı Qunanbaıulynyń eskertkishi aldynda aqynnyń 172 jyldyǵyna oraı saltanatty shara bolyp ótti, dep habarlaıdy «QazAqparat» HAA tilshisi.
Elordalyqtar úshin Abaı eskertkishi aldyndaǵy dástúrli sharany Astana qalasynyń tarıhı-mádenı mura obektilerin jáne eskertkishterdi saqtaýdy qamtamasyz etý jónindegi dırektsııasy ótkizdi. Aqynyn ulyqtaǵan astanalyqtardyń aldynda QR eńbek sińirgen qaıratkeri Qııaqbaı Asambaev Abaıdyń «Aıttym sálem, qalamqas» pen «Kózimniń qarasy» ánderin oryndady. Jandy daýystaǵy «qulaqtan kirip boıdy alar» ásem ánniń oryndaýshysy kópshiliktiń qoshemetine bólendi. Budan keıin Astana qalasy ákimdiginiń qarttar men múgedekterge arnalǵan áleýmettik-medıtsınalyq mekemesiniń qarttary Abaıdyń orys tiline aýdarylǵan óleńderin oqydy.
Sharaǵa QR memlekettik kúzet qyzmetine qarasty 0112, QR Ulttyq ulanynyń 5573 áskerı bóliminiń áskerıleri de qatysty. Abaı murasynan sarbazdar da kende emes eken. Ortaǵa shyǵyp aqynnyń óleńin jatqa aıtyp, ánderin áýelete oryndaǵan sarbazdar shara kórkin qyzdyra tústi. Ásirese, Asqar Bazarbaıdyń gıtaramen oryndaǵan «Kózimniń qarasy» áni jınalǵan jurtshylyqtyń zor yqylasyna ıe boldy.
«Qaraǵandy oblysynyń Maıqudyq óńirinen kelip otyrmyn. 7 jasymnan bastap án aıtamyn. Shyny kerek, buryn gıtaramen Abaıdyń ánderin oryndap kórmeppin. Endigi kezekte, Abaıdyń ózge de ánderin gıtaraǵa salyp, oryndasam ba deımin», - deıdi Asqar Bazarbaı.
Shara barysynda №60 mektep-lıtseıiniń oqýshylary Abaı óleńderin oqyp, kópshilik jyly ásermen tarqasty.
