Astanalyq samboshy qyz Qazaqstan chempıony boldy
ASTANA. 14 naýryz. QazAqparat - Astanalyq samboshy qyz Áıgerim Maqajan Qazaqstan chempıony atandy. Bul týraly elordanyń Týrızm, dene shynyqtyrý jáne sport basqarmasynan habarlady.
11-13 naýryz aralyǵynda Atyraý qalasynda jasóspirimder men boıjetkender arasynda sambodan Qazaqstan Respýblıkasynyń chempıonaty ótti. Jarysta eldiń barlyq óńirlerinen kelgen sportshylar baq talastyrdy.
Astana qalasynyń namysyn bul dodada «Astana batyry» jekpe-jek klýbynyń, Olımpıada rezervin daıarlaý qalalyq ortalyǵy men Astananyń joǵary sporttyq sheberlik mektebiniń samboshylary qorǵady.
Jarysta Astana qalasynyń samboshy qyzdary eseli óner kórsete aldy. Nátıjesinde 60 kelige deıingi sanatta synǵa túsken Áıgerim Maqajan Qazaqstan chempıony atandy. Al Eńlik Musyrman men Ajar Keńpeıil qorjynǵa bir-bir qola medaldan saldy.
Aıta keteıik, eresekter arasyndaǵy Qazaqstan chempıonaty aldaǵy sáýir aıynyń 1-3 kúnderi Jezqazǵan qalasynda ótedi.
