Astanalyq Sábına Baqatova kórkem gımnastıkadan Azııa chempıony atandy
ASTANA. QazAqparat - Astana qalasynyń «Sporttyq joǵary sheberlik mamandandyrylǵan mektebiniń» sportshysy Sábına Baqatova jasóspirimder arasyndaǵy kórkem gımnastıkadan XVI Azııa chempıonatynda 2 altyn jáne bir qola medal jeńip aldy. Bul jaıynda elordalyq mádenıet jáne sport basqarmasynyń baspasóz qyzmetinen málim etti, dep habarlaıdy QazAqparat tilshisi.
Sáýirdiń 27-inen bastap 3 mamyrǵa deıingi aralyqta Malaızııanyń Kýala-Lampýr qalasynda ótken jarysqa Azııanyń 18 elinen sportshylar qatysqan bolatyn.
Sábına Baqatova Qazaqstan quramasynyń sapynda komandalyq birinshilikte altyn medal jeńip aldy. Gımnastıkanyń jekelegen túrleriniń aqtyq synynda ol qola (dop) jáne altyn medal (shoqpar) ıelenip, Azııa chempıony atandy. Sportshynyń jattyqtyrýshysy - Qazaqstan Respýblıkasynyń kórkem gımnastıkadan eńbek sińirgen jattyqtyrýshysy Svetlana Krasnıkova.
Sábına Baqatovadan bólek Kýala-Lýmpýrda №1 Olımpıadalyq rezervtiń mamandandyrylǵan balalar-jasóspirimder sport mektebiniń gımnastshylary óner kórsetti.
Solardyń ishinde Aıbota Ertaıqyzy jasóspirimder arasyndaǵy komandalyq birinshilikte birinshi orynǵa jáne jasóspirimder arasynda lentamen jattyǵý jasaýda úshinshi orynǵa ıe boldy. Al Selına Jumataeva men Adılıa Tilekenova jasópirimder arasyndaǵy komandalyq birinshilikte ekinshi oryn aldy.
Aıta keteıik, kórkem gımnastıkadan XVI Azııa chempıonatynyń qorytyndysynda Qazaqstan komandasynyń gımnastshylary 17 medal, onyń ishinde 7 altyn, 5 kúmis jáne 5 qola medal jeńip alǵan bolatyn.
