Astanalyq rejısserdiń «Tuzaq» atty trılleri kórermenge jol tartty
ASTANA. 28 qarasha. QazAqparat - Astanalyq jas rejısser Mıras Tóleýhannyń «Tuzaq» atty trıller janryndaǵy tyrnaqaldy týyndysy elimizdegi kınoteatrlardyń ekranynan kórsetile bastady.
Fılm oıdan shyǵarylǵan. Sıýjet boıynsha Astanada turatyn bir narkobaron óziniń «tuzaǵyna» elordalyq «altyn jastardy» tarta bastaıdy. Esirtkiniń shyrmaýyna túsken qyz-jigitterdiń sany kúnnen-kúnge arta beredi. Taǵdyr aıdaýymen osyndaı bir tuzaqqa Talant (Ǵanı Ájikenov) pen Arna (Úmıda Muhıtdınova) atty jas jubaılar da túsedi. Osydan keıin shańyraqtary shaıqalǵanyna qaramastan, olar qylmyskerlerge qarsy turady. Mafııadan qasha júrip, ekeýi mahabbattary men adaldyqtaryn syn tezine salady. Týyndynyń rejısseri áli jas ekenin jáne bıýdjetiniń kóp emestigin eskerer bolsaq, fılmdi táp-táýir dep ataýǵa bolady. Tyrnaqaldy týyndy bolǵandyqtan, ara-arasynda azdaǵan kınematografııalyq qateler ketken. Degenmen, rejısser fılmde esirtkiniń adamǵa tıgizetin úreıli zııanyn tolyǵymen ashyp kórsetken. «Meniń fılmim tolyǵymen esirtkige qarsy baǵyttalǵan. Onyń negizgi aıtar oıy - «esirtki - zulymdyq». Biz munda eger esirtki elordamyzǵa dendep enip alatyn bolsa, adamdarǵa ne bolatynyn kórsetkimiz keldi. Sondaı-aq, týyndyda mahabbat pen adaldyqqa, dostyq pen janashyrlyqqa da oryn berilip, qorqynysh pen jaman ádetterge qarsy kúres dáripteledi», - dedi M. Tóleýhan QazAqparat tilshisine bergen suhbatynda. Tolyǵymen kásibı emes akterlerden jasaqtalǵan akterlik quramda óz rólin alyp shyǵa almaǵan bir de biri joq deýge bolady. Olar oınaǵan keıipkerlerdiń ózderine uqsas adamdar bolýy múmkin emes, kóbi ózderine múlde kereǵar keıipkerlerdi somdady. Sonda da barlyǵyn óz ornymen oınap shyqty. «Ózim de kınodaǵy áýesqoı bolǵandyqtan, tek kásibı emes akterlerdi jınaýdy maqsat ettim. Astanada kınoǵa túskisi keletin talantty qyz-jigitter óte kóp eken. Olardyń kóbisiniń Almatyǵa baryp, kastıngke qatysýǵa múmkindikteri bola bermeıdi. Sondyqtan sol múmkindikti men Astanada usynǵym keldi», - deıdi rejısser. Fılmniń túsirilim jumystary 2 jylǵa jýyq sozylǵan. Rejısserdiń aıtýynsha bul jumys ol úshin naǵyz synaq boldy. Endi onyń bolashaqqa degen senimi artyp, karerasyn jalǵastyra túspek. Onyń kelesi jobasy - Astanadaǵy romantıkalyq komedııa. «Tuzaqty» túsirý men úshin óte qıyn boldy. Alaıda aınalama jınalǵan komandam kóp járdem berdi jáne elordalyq kınonyń sátti shyǵýyna atsalysty. Bir jaǵynan bizdiń de kıno túsire alatyndyǵymyzdy kórsetkimiz keldi», - dep túıdi ol.
