Astanalyq reprodýktolog Aqtaýdaǵy sábı súıe almaı júrgen 300 jupqa keńes berdi
AQTAÝ. QazAqparat - Birneshe kún ishinde astanalyq dárigerler Aqtaýdaǵy sábı súıe almaı júrgen 300 jupqa aqyl-keńes berdi. Kelýshiler arasynda buryn astanalyq ortalyqqa kelgen patsıentter de bar.
«Biz olarǵa em qabyldaýdyń durys tásilin úırettik, nátıjesinde kóptegen aqtaýlyq kelinshekter ekstrakorporaldyq uryqtandyrý kómeginsiz óz kúshimen bala kótere aldy jáne keıbir patsıentter birneshe balany ómirge ákeldi. Biz áıeldiń bala týý múmkindigi bar jyldaryn joǵaltpaýǵa tyrysamyz. Aımaq turǵyndarynyń kópshiligi Astanaǵa kelip tekserilip, ýaqyty men aqshasyn qurtady, EKO-ǵa daıyndalady. Al men kóp áıelge saýatty dıagnostıka, konservatıvtik em, gormonaldy túzetý, analyq jasýshany jetildirýdiń jetkilikti ekenin óz tájirıbemnen bilemin.
EKO qyzmeti kez kelgen ýaqytta barlyq áıelge birdeı kórsetilmeıdi. Sondyqtan, túrli aımaqtaǵy áıelderge baryp kómektesý kerek. Bolashaqta Atyraý men Aqtaý fılıaldarynyń negizinde ekstrakorporaldyq uryqtandyrý jasalady», - dedi bıologııa ǵylymdarynyń doktory, dotsent, «Ekomed» urpaq órbitý ortalyǵynyń dırektory Saltanat Baıqoshqarova.
Mańǵystaýda EKO ádisimen myńǵa jýyq sábı dúnıege kelgen. QR boıynsha, 12 myń shamasynda.
Endi balaly bolǵysy kelgen juptar Aqtaý qalasynda ashylǵan ortalyq fılıaly arqyly tekserilip, em qabyldaı alady. Jáne eń bastysy, onda Astanada bilim alǵan bilikti dárigerler jumys isteıtin bolady.
