Astanalyq pýlmonologtar men allergologtar tegin keńester berdi
ASTANA. QazAqparat - Búgin №1 qalalyq aýrýhanada Dúnıejúzilik bronhıaldy astmamen kúres kúnine oraılastyrylǵan ashyq esik kúni ótti, dep habarlady astana.gov.kz.
Pýlmonologtar men allergologtar patsıentter men táýekel topqa jatatyn nemese bronhıaldy astmaǵa shaldyqtym dep oılaıtyn adamdarǵa tegin keńester berdi.
Osy sııaqty shara úsh jyldan beri ótkizilip keledi. Jyl saıyn demikpemen aýyratyn qala turǵyndary dárigerlerden aýrý men ony emdeý joldary týraly qajetti aqparat alady.
«Bul shara arqyly halyqtyń barlyq toptaryn qamtýǵa tyrysamyz, bizdiń basty mindetimiz - aýrýdyń aldyn alý. Keıbir patsıentterde bronhıaldy astma emes, allergııalyq aýrý nemese demikpege aýysatyn astma kezdesedi. Sondyqtan profılaktıka júrgizý kerek. Munymen qosa, shara barysynda naýqastarǵa atalǵan aýrýǵa shaldyqqanda ózin-ózi qalaı ustaný keregi týraly aqparat beriledi. Negizinen, dárigerge ýaqytyly júginip, barlyq keńesterdi saqtaǵan jaǵdaıda, astmany retteýge bolady», - dedi Astana qalasynyń Salaýatty ómir saltyn qalyptastyrý ortalyǵynyń dırektory Aqmaral Qurmanbaeva.
Búgin 80 jýyq adam konsýltatsııalar men joldamalar aldy, dárigerler kóbiniń emin túzetti.
«Mundaı is-sharalardy ótkizý mańyzdy, óıtkeni, patsıentterdiń bári birdeı pýlmonologqa bara bermeıdi. Tar sheńberli mamandar barlyq emhanalarda bar dep aıta almaımyn, ásirese, pýlmonologııa - bul tapshy mamandyq, Qazaqstan boıynsha mundaı dárigerlerdiń sany 100-den aspaıdy», - dedi «Astana» medıtsına ýnıversıteti pýlmonologııa kafedrasynyń kómekshisi Ásııa Toqsarına.
Dárigerler bronhıaldy astmanyń qazirgi zamanǵy dıagnostıkalaý jáne emdeý ádisteri jaıly aıtyp berdi, adamdardy dene shynyqtyrýmen aınalysýǵa, salaýatty ómir saltyn ustanýǵa jáne durys tamaqtanýǵa shaqyrdy.
