Astanalyq prokýrorlar qaladaǵy bilim berý mekemelerindegi balalardyń densaýlyqtaryna alańdaýshylyq bildirip otyr
ASTANA. Sáýirdiń 16-sy. QazAqparat /Aıdar Ospanalıev/ - Astana qalalyq prokýratýrasynyń qyzmetkerleri elorda mektepterindegi balalardyń aýrý-syrqaýǵa shaldyǵýy jıilep bara jatqandyǵyna alańdaýshylyq bildirdi,
dep habarlaıdy QazAqparat.
Astana qalalyq prokýratýrasynyń Áleýmettik-ekonomıkalyq salalardaǵy zańnamalardy qadaǵalaý basqarmasynyń prokýrory Amantaı Bájeevtiń sózine qaraǵanda, densaýlyǵynda min joq balalar sany elordada kúnnen kúnge azaıyp barady. Buny osy sala boıynsha arnaıy júrgizilgen tekserý jumystarynyń qorytyndylary da rastap otyr. Aıtalyq 1-shi jáne 4-shi synyp oqýshylary arasynda sozylmaly dertter jıi kezdesetin bolsa, 11 synypqa qaraı aýrý balalar sany arta túsedi. Budan mektep oqýshylary bilim berý úderisindegi qosymsha júktemelerge úırene almaı jatqandyǵyn kórýge bolady. «ıAǵnı oqý barysyndaǵy qosymsha júktelemeler olardyń densaýlyqtaryna keri áserin tıgizip otyr. Nátıjesinde, Astana qazir oqýshylardyń aýrý-syrqaýǵa shaldyǵýy jaǵynan respýblıkada aldyńǵy oryndardyń birinde», dedi prokýror.
Onyń qalalyq Densaýlyq saqtaý basqarmasynyń málimetterine súıene otyryp keltirgen dáıekterine qaraǵanda, mektepke deıingi balalardyń árbir tórtinshisiniń, mektep oqýshylarynyń árbir úshinshisiniń, al jasóspirimderdiń árbir ekinshisiniń densaýlyǵy nashar.
Mamandardyń qorytyndylaryna qaraǵanda, balalardyń arasynda aýrýdyń kóp taraýy negizinen turǵyndar men oqýshylardyń sanıtarlyq-gıgıenalyq talaptardy bilmeýine baılanysty bolyp otyr. Naqtyraq aıtqanda, mektepte gıgıenalyq talaptar tolyǵymen qadaǵalanbaıdy jáne sabaq barysynda oqýshylardyń psıhologııalyq jaǵdaılary nazarǵa alynbaıdy. Al oqýshylar meńgerýleri tıis kóptegen pánder olardyń kúrdeliligine qaraı rettelýi tıis. Sondaı-aq sabaq barysynda dene jattyǵýlaryn oryndap turý sııaqty sharalar qolǵa alynbaǵan.
«Qoryta aıtqanda, mektepterde oqýshylardyń densaýlyqtaryn qalypqa keltirip, nyǵaıtý baǵytynda júıeli sharalar joqtyń qasy. Jalpyǵa birdeı bilim berý oryndarynda oqýshylardyń densaýlyqtaryna keri áserin tıgizip otyrǵan ózge de faktorlar bar. Olar negizinen mektepterdegi balalar sanynyń shekten tys kóp bolýy, olardyń qajetti sporttyq qurylǵylar men qural-jabdyqtarmen
tolyq kólemde qamtylmaýy, oqýshylardyń sabaq arasynda tamaqtanýlaryna jetkilikti kólemde ýaqyttyń bólinbeýi, ashanalardaǵy oryndardyń jetispeýshiligimen baılanysty, dedi Amantaı Bájeev.
