Astanalyq prıma-balerına Rımdegi aspan asty amfıteatrynda óner kórsetti

NUR-SULTAN. QazAqparat – Elordadaǵy «Astana Opera» opeara jáne balet teatrynyń ártisi, prıma-balerına Áıgerim Beketaeva Italııa astanasy Rım tórindegi aspan asty amfıteatrda 7 myń kórermenniń aldynda óner kórsetti, dep habarlaıdy QazAqparat tilshisi.

«Italııada óner kórsetý josparda bolǵan joq. Eńbek demalysymda óner kórsetý týraly usynys kelip tústi de, bir-eki kúnniń ishinde Italııada boldym. Aıaq astynan bolǵandyqtan ashyq aspan astyndaǵy amfıteatr sahnasyna shyqqanymdy ózim de túsinbeı qaldym. Men «Travıata» jáne «Aıda» operasynda bıleýge shaqyrdym. Eki spektakl eki retten sahnalandy. Sahnaǵa shyqpaǵaly biraz boldy, jalpy álemdik deńgeıdegi sahnada óner kórsetkenime qýanyshtymyn. Teatr ishinde óner kórsetkennen ashyq aspan astynda qalyń kórermen aldynda bılegen múldem bólek. Árıne qobaljý boldy, kórermenderdiń kóńilinen shyqty dep oılaımyn», - dedi Áıgerim Beketaeva.

Rımdegi aspan asty amfıteatry 13 500 adamǵa arnalǵan. Pandemııaǵa baılanysty shekteý engizilip, jerlesimiz óner kórsetken qoıylymda 7 myń kórermen bolǵan.

«Ondaǵy ujym óte tatý, biz alǵashqy kúnnen til tabysyp, dostasyp kettik. Jumys barysynda eshqandaı kedergi bolǵan joq. Qoıylymda bıshilerden bólek, opera ánshileri de óner kórsetti. Italııalyqtar úshin ónerdiń onyń ishinde opera men balettiń erekshe ekeni bárimizge belgili. Sol sııaqty maǵan sahna kostıýmderi erekshe unady, men ózimdi ertegi keıipkeri sezindim. Italııada óner kórsetken sátti umytpaımyn, onyń ústine týǵan kúnimdi de sol jaqta qarsy aldym. Kelgennen soń áriptesterimmen alǵan áserim men tájirıbemmen bólistim», - deıdi ol.