Astanalyq polıtsııa qyzmetkerleri telefon alaıaǵyn ustady
ASTANA. 21 aqpan. QazAqparat - 19 aqpanda Astana qalasy ІІD Saryarqa aýdany ІІB-niń kezekshilik bólimine keshqurym astanalyq turǵyn habarlasty. Onyń aıtýynsha, ózin polıtsııa qyzmetkeri dep tanystyrǵan belgisiz bireý oǵan qalalyq telefonyna habarlasyp, ulynyń keleńsiz jaıtqa tap bolǵanyn aıtqan.
Ádettegideı, alaıaqtardyń «shemasy» boıynsha, qamaýǵa alynǵan ulyna kómektesý úshin polıtseılerge belgili mólsherde aqsha tóleý qajet boldy. Túıindi sheshý úshin 500 000 teńge talap etilgen. Bul týraly Astana qalasy boıynsha ІІD-niń baspasóz qyzmetinen habarlandy.
Áıel birden polıtsııaǵa shaǵymdanǵan. Oqıǵa ornyna Saryarqa aýdany boıynsha ІІB-niń qyzmetkerleri jetti, olar aqshany tapsyrý kezinde 23 jastaǵy Qostanaı oblysynyń S. esimdi azamatshasyn ustady. Áıeldi tekserý kezinde odan 3 uıaly telefon men sım-kartalar tabyldy. S. esimdi azamatshanyń úıin tintý kezinde 4 parık pen 8 sım-karta tárkilendi.
Qazirgi ýaqytta onyń telefon alaıaqtyǵynyń 5 oqıǵasyna qatysy bar ekendigi anyqtaldy.
S. esimdi azamatshaǵa qatysty «Alaıaqtyq» faktisi boıynsha qylmystyq is qozǵaldy.
Qazirgi ýaqytta jas qyz Astana qalasy boıynsha ІІD-niń ýaqytsha oqshaýlaý abaqtysyna qamaldy.
