Astanalyq polıtseıler kolesa.kz saıtynda alaıaqtarǵa aldanǵandardy izdestirýde
ASTANA. QazAqparat - Astana qalalyq ІІD krımınaldyq polıtsııa qyzmetkerleri Qostanaı oblysynyń bir top turǵynyn ustady. Atalǵan top bógde adamdardyń bank kartalaryn paıdalana otyryp, ınternet arqyly qylmys jasaǵan, dep habarlaıdy QazAqparat qalalyq ІІD baspasóz qyzmetine silteme jasap.
Kúdiktiler kóliktiń qosalqy bólshekterin satyp alý men jetkizý týraly jalǵan jarnamany www.kolesa.kz saıtyna jarııalap, ózderiniń baılanys nómirlerin qaldyrǵan. Jarnama boıynsha habarlasqan adamdardan qosalqy bólshekterdi satyp alý boıynsha tapsyrys qabyldaǵan. Óz qyzmetteri úshin tólemdi aldyn ala esepshottarǵa aýdarǵan jaǵdaıda, jaqyn kúnderi qajetti bólshekter jetkiziletinin eskertken. Biraq kúdiktiler aqsha banktegi esepshotqa túsken soń telefondaryn sóndirip, kún saıyn baılanys nómirlerin aýystyryp otyrǵan.
Qazirgi tańda atalǵan qylmys boıynsha tergep-tekserý jumystary júrgizilýde. Astana qalalyq ІІD kolesa.kz saıtyndaǵy jalǵan jarnama boıynsha Grıgorıan Vıktor, Martynov Gennadıı, Tıtov Sergeı, Beısen Temirlan esimdi azamattardyń banktik esepshottaryna aqsha aýdaryp, avtoqosalqylarǵa tapsyrys berýde aldanǵan azamattardy 8(7172) 716335, 716291, 716010, 87012396000 telefondary boıynsha baılanysýyn suraıdy.
Polıtseıler turǵyndarǵa ınternette taýarlarǵa tapsyrys bergende saq bolýyn, taýarlardyń jetkizilýi men habarlandyrýdyń rastyǵyna kóz jetkizýin, tapsyrys bergen taýardyń fotosy men vıdeosyn suraýyn, ıaǵnı taýardy kórmeı turyp tólem jasamaýyn, sonymen qatar kúdikti bolyp kórinse tapsyrys jasamaýyn eskertedi.
Dáýlet ІZTІLEÝ
