Astanalyq polıtseıler kishkentaı balany 10-qabattan qulap ketýden saqtap qaldy
ASTANA. QazAqparat - Astana ishki ister departamenti jergilikti polıtsııa qyzmetiniń jol-patrýl polıtsııasy polkiniń qyzmetkerleri - polıtsııa kishi leıtenanty Qaıyrjan Quttybaev pen polıtsııa aǵa serjanty Maksım Vershının 5 jasar balany onynshy qabattan qulap ketýden saqtap qaldy, dep málimdedi Astana ІІD baspasóz qyzmeti.
«16 qazan kúni shamamen 16:00-de Jedel basqarý ortalyǵyna Tilendıev kóshesiniń boıyndaǵy turǵyn úıdiń 10-qabatyndaǵy balkonda kishkentaı bala jylap tur, qulap ketý qaýpi bar degen habar kelip tústi. Oqıǵa ornyna jetip barǵan polıtseıler aldymen balaǵa ishki kirýge shaqyrady, artynsha joǵaryǵa jyldam kóterilip balany jubatqan», - delinedi habarlamada.
Sol kezde 5 jasar balany úıde jalǵyz qaldyryp ketken týysy kelip qalǵan. Ol 3 jasar balany ertip, balkonnyń esigin ashyq qaldyryp, dúkenge ketken.
30 jastaǵy turǵynnyń aıtýynsha, ol balalarǵa áke-sheshesi jumysta kezinde qarap júrgen. Polıtsııa qyzmetkerleri balany úıde qaraýsyz qaldyrmaý qajettigi, onyń nendeı saldarǵa ákep soqtyrýy múmkin ekendigi jóninde túsindirý jumystaryn júrgizdi. Budan tys, terezelerdiń qaýipsizdigin nyǵaıtý boıynsha keńesterin berdi.
