Astanalyq polıtseıler qatty mýzyka jáne túngi shýmen qalaı kúresip jatyr

NUR-SULTAN. QazAqparat – Jaz mezgili kelisimen qala jurtshylyǵy kúndiz jáne keshqurym úıdiń terezesin ashyp qoıatyny belgili. Osyndaı kezde daladaǵy qatty qoıylǵan mýzyka men kóshedegi shýlaǵan adamdar mazany alyp jatady. Osy oraıda astanalyqtardyń tynyshtyǵyn qorǵaý sharalaryna qatysty QazAqparat tilshisi Nur-Sultan qalalyq polıtsııa departamentine júgingen edi.

Qalalyq polıtsııa departamenti bul problemadan habardar. Sol sebepti kúndelikti aldyn alý sharalaryn ótkizedi.

«Patrýldik polıtseıler bekitilgen baǵytpen kúndelikti keshke jáne túnde aýlalardy jaıaý jáne kólikpen aralaıdy. Sonymen qatar profılaktıkalyq is-sharalar kezeńinde ýchaskelik polıtsııa ınspektorlary aýlalardy túngi ýaqytta sholyp shyǵady», - degen jaýap berildi saýalǵa.

Onymen qosa, Esil aýdanynyń polıtsııa basqarmasynda ótken brıfıngi aldynda qalalyq polıtsııa departamentiniń resmı ókili Nuraly Táńirbergenov aýlalardy aralaý erejesin túsindirip berdi.

«Kún saıyn ýchaskelik bekette kezekshi jáne avtopatrýldik polıtseı jumys isteıdi. Olar kúndizgi shaqyrtýlarǵa jaýap beredi. Shaqyrtý alǵan sátte jáne shaqyrtý joq kezde de polıtsııa ınspektorlary aýla aralap, patrýl jasaıdy», - deıdi ol.

Onyń aıtýynsha, qazirgi ýaqytta patrýldik aralaý negizinen krımınogendik jaǵdaı jıi bolatyn aýdandarda júredi.

«Turǵyndardyń 99 paıyzyn basqa óńirden kelgender, ıaǵnı páter jaldaýshylar quraıtyn turǵyn úı keshenderi bar. Ondaı turǵyn úı keshenderinde únemi urys-keris, aıqaı-shý bolyp jatady», - deıdi ol.