Astanalyq polıtseıler qalaǵa kire beriste iri kólemde esirtki tárkiledi
ASTANA. 20 qańtar. QazAqparat - Astanalyq polıtseıler qalaǵa kire beriste 5 keliden astam esirtki zatyn tárkiledi.
Bul týraly astana.kz saıtyna Іshki ister departamentinen habarlady.
«Tekserý barysynda Jambyl jáne Aqmola oblystarynyń eki turǵyny ustaldy. Qyzmettik izdeý ıti kóliktiń júksalǵyshynan 5 keliden astam marıhýana tapty. Sonymen qatar, salonnan kúdikti zat oralǵan túıinshek tabyldy. Sarapshylardyń qorytyndysy boıynsha, bul jalpy salmaǵy 73 gramm gashısh bolyp shyqty», - delingen habarlamada.
Aıta keteıik, elordalyq polıtseıler esirtkiniń iri kólemin ústimizdegi jyldyń 18 qańtarynda Qyzyljar bógeý beketinde «Astana - esirtkisiz qala» jedel aldyn alý is-sharasyn ótkizý barysynda anyqtady.
Vedomstvonyń habarlaýynsha, ótken jyly polıtsııa qyzmetkerleri esirtkige qatysty 193 qylmystyq is qozǵady, sonyń ishinde 121 adam esirtki satýmen aınalysqan. 275 keliden astam túrli esirtki zattary zańsyz aınalymnan shyǵaryldy, sonyń ishinde 22 kelisi geroın, 252 keliden astamy marıhýana jáne 2 kelige jýyǵy gashısh.
