Astanalyq polıtseıler 90 adamnyń qatysýy yqtımal toptasqan tóbelestiń aldyn aldy
ASTANA. Qarashanyń 10-y. QazAqparat /Gúlmıra Álıakparova/ - Astanada ótkizilip jatqan «Barys» shuǵyl izdestirý jáne aldyn alý sharalarynyń nátıjesinde 90 adamnyń qatysýymen josparlanǵan toptasqan tóbelestiń aldy alyndy.
Bul týraly búgin ótken brıfıngte Astana qalalyq ІІD bastyǵynyń birinshi orynbasary Arman Orazalıev málim etti, dep habarlaıdy QazAqparat.
«Barys» aldyn alý is-sharasy ІІD-niń Uıymdasqan qylmysqa qarsy kúres jáne jol polıtsııasy basqarmalarynyń, sondaı-aq «Arlan» arnaıy maqsattaǵy bólimshesiniń qyzmetkerlerimen ótkizilýde.
«Onyń barysynda azamattardan 46 taıaqsha, 3 jalǵan kýálik, «Osa» jáne «Strajnık» úlgisindegi 12 zaqymdaýshy tapansha men 2 Makarov tapanshasy tárkilendi. Polıtsııa qyzmetkerleriniń kómegimen 7 toptasqan tóbeles toqtatyldy, olardyń birinde 90 adamnyń qatysýy josparlanǵan», dep atap ótti ol.
A.Orazalıevtiń aıtýynsha, iri tóbeleske qatyspaq bolǵandardyń basym bóligi jastar. Qazir qaqtyǵystyń sebepteri anyqtalýda.
