Astanalyq oıyn-saýyq oryndary temeki shegýge tyıym salý jónindegi zańnamalardy belden basyp otyr
ASTANA. Tamyzdyń 25-i. QazAqparat /Aıdar Ospanalıev/ - Astanada dúkender men dámhanalarda ruqsat etilmegen oryndarda temeki shegý men saǵat túngi 23-00-den keıin spırtti ishimdikterdi satýǵa qatysty zańnama talaptarynyń oryndalýy boıynsha arnaıy reıd sharalaryn júrgizgen úkimettik emes uıym ókilderi úlken kedergilerge tap boldy.
Bul týraly búgin osy másele boıynsha arnaıy jýrnalıstermen kezdesken «Esirtkisiz bolashaq» korporatıvti qorynyń baspasóz hatshysy Svetlana Penkova málim etti.
Onyń sózine qaraǵanda, reıd sharalaryn «Esirtkisiz bolashaq» qorynyń ókilderi Astana qalalyq Іshki saıasat departamentiniń uıymdastyrýymen jáne Astana qalalyq Іshki ister departamenti ókilderiniń qoldaýymen tamyzdyń 13-i men 15-i aralyǵynda júrgizgen.
«Reıd sharalary eki baǵytta júrdi. Onyń birinshisi ruqsat etilmegen oryndarda temeki shegýmen baılanysty bolsa, ekinshisi saǵat túngi
23-00-den keıin ishimdik satýǵa qatysty boldy. 3 kún ishinde 20 oıyn-saýyq oryndary tekserilip, olardyń 6-nan quqyq buzý áreketteri anyqtaldy. Olardyń arasynda elordadaǵy «Jaıyq», «Marııa», «Gota», «Chelsı» dámhanalary bar», dedi baspasóz hatshysy.
Onyń sózine qaraǵanda, reıd jumystarynyń barysynda atalǵan oıyn-saýyq orny ıeleriniń zańǵa shekten tys nemquraıdylyqpen qaraıtyndyǵy baıqaldy. «Basqasha aıtqanda, tekserilgen nysandarda azamattar zańmen ruqsat etilmegendigine qaramastan, temekini emin-erkin shegip otyrdy. Al oıyn-saýyq ornynyń ıeleri olardyń zań buzǵandyǵyn eskertpegen, kerisinshe olardyń temeki shegýlerine qolaıly jaǵdaı týdyrǵan. Sonysyna qaramastan olar ózderiniń kemshilikterin moıyndamaı, bar báleni temeki shegishýlerdiń ózderine japty. Zań boıynsha ruqsat etilmegen jerde temeki shekken adam kináli bolyp esepteledi. Al oıyn-saýyq ıesine bul rette eshqandaı jaýapkershilik qarastyrylmaǵan. Sondyqtan qoldanysqa jańa engen zańda oıyn-saýyq nysany ıeleriniń de jaýapkershilikterin qarastyrǵan jón», dedi S.Penkova.
Sondaı-aq ol sózinde, elimizdegi kóptegen azamattardyń atalǵan zańdardan habardar emestigin jetkizip, bul máselelerdi qalyń kópshiliktiń jetkilikti bilýi úshin úgit-nasıhat jumystaryn keshendi júrgizý qajettigin aıtty.
