Astanalyq órt sóndirýshi Asqar Zabıkýlınniń áriptesterine psıhologııalyq kómek kórsetilip jatyr

ASTANA. QazAqparat – Qyzmettik mindetin atqarý kezinde denesiniń 80 paıyzyn kúıik shalyp, keıin aýrýhanada qaıtys bolǵan Asqar Zabıkýlınmen qatar, oqıǵa ornynda jumys istegen qutqarýshylarǵa psıhologııalyq kómek kórsetilip jatyr. Bul týraly QazAqparat Tótenshe jaǵdaılar mınıstrliginiń baspasóz qyzmetine silteme jasap habarlaıdy.

«Qaharman» turǵyn úıindegi órtti sóndirý jumystaryn júrgizgen 10 órt sóndirýshi-qutqarýshy TJM Psıhologııalyq daıarlyq ortalyǵynda psıhologııalyq ońaltýdan ótip jatyr. Maqsat – qyzmettesinen aırylǵan qutqarýshylardy kúızelisten ońaltý, sondaı-aq olardy psıhologııalyq qorǵaý maqsatynda mamandandyrylǵan psıhoterapııalyq kómek kórsetý. Bul psıhologııalyq qysymdy joıýǵa jáne qaýipti ári jaýapty maman ıeleriniń aldyna qoıylǵan mindetterin oryndaýyna psıhologııalyq-emotsıonaldy jaı-kúıin qalyptastyrýǵa múmkindik beredi.

Psıhologııalyq daıarlyq ortalyǵy 2021 jyly Tótenshe jaǵdaılar mınıstri ıÝrıı Ilınniń bastamasymen TJM qyzmetkerleriniń psıhologııalyq daıarlyq deńgeıin jetildirý jáne arttyrý maqsatynda qurylǵan. Ortalyqtyń biregeıligi – qyzmetkerlerdi psıhologııalyq daıarlaý júıesine ınnovatsııalyq kózqaras, jańa qoldanbaly tehnologııalardy paıdalaný, atap aıtqanda jedel profaılıng, neırofızıologııa jáne kognıtıvtik psıhologııa salasyndaǵy biregeı ázirlemeler, sondaı-aq ortalyqtyń tájirıbeli psıhologteri jınaqtaǵan ekstremaldy psıhologııa salasyndaǵy praktıkalyq ádister.

Arnaıy jabdyqty qoldanýmen 5-7 kún boıy ótetin psıhoterapııalyq sessııalar tózimdilik jattyǵýlaryn, reaktsııalardyń jyldamdyǵyn, oılaýdyń jedeldigin jáne psıho-emotsıonaldy turaqtylyqty jattyqtyrýǵa baǵyttalǵan.

Ekinshi kezeńde qutqarýshylardyń otbasy músheleri psıhoterapııalyq seanstardan ótedi.

Ortalyqtyń fýnktsııalaryna kadrlyq áleýetti daıyndaý jáne anyqtaý, qyzmetkerlerdiń resýrstaryn taný kiredi. Ortalyq jumys istegen ýaqyt ishinde 700-den astam qyzmetkermen jumys júrgizilip, 30-dan astam trenıng ótkizilgen.

Eske sala keteıik, elordada kópqabatty úıde órt bolyp, 3 adam, onyń ishinde bir bala aýrýhanaǵa tústi. Al, 3 adamdy qutqarǵan órt sóndirýshi Asqar Zabıkýlındi 80% kúıik shalyp, jansaqtaý bólimine jatqyzyldy. Oǵan dostary kómek jınady.

Memleket basshysy erlik kórsetken jáne birneshe adamnyń ómirin qutqarǵan elordalyq órt sóndirýshilerdi Qazaqstan Respýblıkasynyń memlekettik nagradalarymen marapattaý týraly Jarlyqqa qol qoıdy.

Keıin onyń otbasyna úsh bólmeli páterdiń sertıfıkaty tabystalǵan bolatyn.

Denesiniń 80 paıyzyn kúıik shalǵan órt sóndirýshi 20 qarashada aýrýhanada qaıtys boldy.

Marqumnyń otbasyna kóńil aıtqan Prezıdent Astana kóshesine Asqar Zabıkýlınniń esimi berilip, bıýsti ornatylatynyn málimdedi.

Sondaı-aq, Ǵylym jáne joǵary bilim mınıstrligi adamdardy qutqaryp júrip kóz jumǵan Asqar Zabıkýlınniń otbasyna grant bólingenin málimdedi.