Astanalyq onkologııa ortalyǵynyń qaryzy 2,7 mlrd teńgege jetken
«Nur-Sultan qalasyndaǵy onkologııalyq ortalyq – kommýnaldyq kásiporyn jáne ol qala ákimdigine qaraıdy. Mine, sondyqtan, ákimdik eń aldymen osy memlekettik klınıkanyń qaryzdary men mindettemeleri úshin jaýap beredi. Búgingi tańda osy onkologııalyq ortalyqtyń SK-Farmatsııa dári-dármekterin jetkizýshi aldynda qaryzy bar. Barlyq dári-dármekter SK-Farmatsııa arqyly satyp alynyp, jetkiziledi. Qaryz qazir 2,7 mıllıard teńgeni quraıdy. Ol bereshek sońǵy bes jyl ishinde qordalanyp qalǵan. Bes jyl boıy onkologııalyq ortalyq qaryzǵa batty da, «SK-Farmatsııa» bul dári-dármekti aqysyz jetkizip otyrdy. Áıtse de, onkologııalyq ortalyq - tolyǵymen bıýdjetten qarjylandyrylyp otyrǵan mekeme», - dedi Densaýlyq saqtaý mınıstri.
Eljan Birtanovtyń aıtýynsha, osy klınıkanyń basshylyǵyna qatysty eshqandaı shara qoldanylmaǵan.
«Sot «SK-Farmatsııa» aldyndaǵy qaryzdy tóleý týraly sheshim qabyldady, óıtkeni «SK-Farmatsııa» da - memlekettik kompanııa. Endi dári-dármekti óndirýshilerdiń shydamy shegine jetti - olar aqysyz dári-dármek jetkizgisi kelmeı, tasymaldy toqtatqaly otyr. Shema qalaı jumys isteıdi: biz dárihanalardan dári-dármektiń kólemi týraly ótinim qabyldaımyz. Zaýyttardan satyp alamyz da, tasymal aldyn ala tólemsiz júzege asyrylady. Aýrýhana medıtsınalyq qyzmetter úshin qarjylandyrylyp, keıin «SK-Farmatsııaǵa» aqshasyn tóleıdi. Al «SK-Farmatsııa» farmatsevtıkalyq zaýyttarǵa aqshasyn beredi», - dep túsindirdi Eljan Birtanov.
Densaýlyq saqtaý mınıstrligi basshysynyń aıtýynsha, búginde elimizde memlekettik klınıkalardyń «SK-Farmatsııa» aldyndaǵy qaryzy 17,7 mlrd teńgege jetken.
Sondaı-aq, ol onkologııalyq ortalyqtyń qaryzy qalaı jabylatynyn habarlady.
«Mine, ókinishke qaraı, bizde bul ortalyqqa qatysty másele sozylmaly sıpatqa ulasty. Meniń oıymsha, bul qaryz jergilikti bıýdjettiń esebinen jabylady. Sonymen birge, isikke qarsy dári-dármekti jetkizýdi toqtatyp tastamaı, naýqastar zardap shekpes úshin tıisti buıryq berildi», - dedi mınıstr.