Astanalyq ónerpazdar Syr halqyna tartý jasady
QYZYLORDA. QazAqparat - Qyzylorda oblysynda Astana qalasynyń mádenı kúnderi ótti. Mádenı kúnder barysynda kóptegen is-sharalar uıymdastyryldy, dep habarlaıdy QazAqparat tilshisi.
Elordanyń mádenı kúnderi aıasynda «Máńgilik bala beıne» atty qýyrshaq teatrynyń qoıylymy, «Aq tilekpen, Astana!» kórmesi jáne qazaqstandyq estrada juldyzdarynyń qatysýymen gala-kontsert ótti.
Qyzylorda oblysynyń ákimi Qyrymbek Kósherbaev astanalyq qonaqtardy 20 jyldyq mereıtoımen quttyqtap, jańa jetistikter tiledi.
«Búginde Astana eń qysqa merzimde salynyp, álemdi súısintken, jahandyq sáýlet ónerindegi birden-bir qaıtalanbas «Ǵasyr jobasyna» aınaldy. Bıyl - Astana qalasynyń 20 jyldyq merekesi ótse, endi Qyzylorda qalasynyń 200 jyldyq mereıtoıy atap ótiledi. Qazaqstannyń alǵashqy jáne búgingi Astanasynyń arasyndaǵy osy bir baılanys kóp nárseni ańǵartsa kerek. Astananyń 20 jyldyq mereıtoıyna oblystan syı retinde zymyran - ǵaryshtyq tehnıka mýzeıiniń ashyq ekspozıtsııasynyń qurylysy Elbasynyń qatysýymen saltanatty túrde ashyldy. Baıqońyr ǵarysh aılaǵy - qazaq halqynyń ǵana emes, búkil adamzattyń maqtanyshyna aınalǵan tarıhı keshen»,-dedi aımaq basshysy.
Aıta keteıik, bıylǵy jyly Syrdarııanyń sol jaǵalaýynda Astana ispetti jańa qala salynýda, onyń ishinde 1925 jyly ultqa «qazaq» ataýyn berý týraly tarıhı sheshim qabyldanǵan burynǵy QazOAK ǵımaratynyń syzbasyna sáıkes qaıta jańǵyrtylyp jatqan «Rýhanı jańǵyrý» ortalyǵy salyndy.
Astana delegatsııasy Qyzylorda oblysyna jasaǵan sapar barysynda aımaqtyń tarıhı, mádenı, áleýmettik jáne ónerkásiptik nysandaryn aralap kórdi. Qarmaqshy aýdanyndaǵy Qorqyt Ata memorıaldyq kesheni, Memlekettik rámizder alleıasy, sol jaǵalaýdaǵy «Rýhanı jańǵyrý» ortalyǵy, Kásipkerler palatasy, IT parki jáne t.b kórneki oryndarymen tanysty.
Astana qalasynyń Qyzylorda oblysyndaǵy kúnderi búginde jalǵasady. Elordadan kelgen meımandar Á.Tájibaev atyndaǵy IT parki, «Dostyq úıi» jumysymen jáne Syrdarııa aýdany Besaryq aýylynyń tynys-tirshiligimen tanysady.
