Astanalyq oqýshylarǵa otandyq fılmder tegin kórsetilýde

ASTANA. QazAqparat - Óskeleń urpaq qazaq halqynyń tarıhy men mádenıetin tanyp-bilýi úshin elordalyq oqýshylarǵa «Uly dalanyń murasy» kınojobasy uıymdastyryldy, dep habarlaıdy «QazAqparat» qala ákimdiginiń saıtyna silteme jasap.

Joba aıasynda 22 qarashadan bastap Astana qalasynyń barlyq kınoteatrlarynda 5-11 synyp oqýshylary úshin qazaqtyń bolmysy men dástúri pash etetin «Jaýjúrek myń bala», «Almas qylysh», «Anaǵa aparar jol», «Jeruıyq», «Qunanbaı», «Juldyzdar toǵysqanda» otandyq fılmderi tegin kórsetiledi.

«Jastarǵa kórsetiletin barlyq týyndylar - tarıhı fılmder jáne bul beker emes. Memleket basshysy «Uly dalanyń jeti qyry» maqalasynda ulttyq tarıhty bilip-tanýdyń mańyzyn erekshe atap ótti», - dedi Astana qalasy Qoǵamdyq damý isteri basqarmasynyń basshysy Danııar Esın.

Ol tarıh úshin namys jáne patrıotızm sezimin oıatý mektep qabyrǵasynan bastalýy tıistigin atap ótti. «Bizdiń oıymyzsha, otandyq kınematograf arqyly oqýshylarymyz qazaq halqynyń ejelgi ǵasyrlardan qalyptasqan qundylyqtaryn tereń sezine alady», - dep atap ótti ol.

Búgin «Kerýen» saýda, oıyn-saýyq ortalyǵynda «Jaýjúrek myń bala» kınokartınasy kórsetilip, ony birden birneshe mekteptiń oqýshylary tamashalady.

«Óskeleń urpaq úshin kıno - tarıhı qundylyqtardy alǵa jyljytýdyń eń úzdik arnasy. Fılmder arqyly balalar jarqyn tarıhı mysaldarǵa nazar aýdaryp, Otanǵa degen naǵyz mahabbattyń, jaqyndary men dostarynyń qurmeti men qoldaýy ne ekenin túsinedi», - dep atap ótti D.Esın.

Kınofılmderdi 2018 jyldyń sońyna deıin kórsetý josparlanyp otyr. Olarǵa qalanyń barlyq mektep oqýshylary qatysady. Uıymdastyrýshy - Astana qalasynyń ákimdigi.