Astanalyq oqýshylardyń 70-80% úı mańyndaǵy mektepke barmaıdy
ASTANA. QazAqparat - «Astana Innovations» AQ Basqarma tóraǵasy Oljas Sartaev 2019 jyly elordada júzege asyrylatyn jobalar týraly aıtyp berdi, dep habarlaıdy QazAqparat tilshisi.
Onyń aıtýynsha, jańadan turǵyzylatyn mektepter men aýrýhanalar jańa tsıfrlyq karta derekterine sáıkes josparlanbaq.
«Big data, ıaǵnı úlken derekterdi qamtıtyn jańa aqparattyq-taldamalyq júıeni ázirledik. Ol arqyly Astana turǵyndarynyń qaıda turatynyn jáne jumys isteıtinin, qaıda oqıtynyn kóre alamyz. Sáıkesinshe, jańa aýrýhanalar men mektepterdi, emhanalar men jedel járdem beketterin adam kóp shoǵyrlanǵan oryndarǵa turǵyzýǵa keńes beremiz», - dedi Oljas Sartaev Astana ákimdiginde ótken baspasóz máslıhatynda.
Sondaı-aq O. Sartaev elorda oqýshylarynyń kún saıyn ózge aýdandarǵa baryp bilim alatynyn, olardy jetkizip salýdan kólik keptelisi týyndaıtynyn atap ótti.
«Qazaqstanda jasalǵan jańa júıe kómegimen taldaý júmystaryn júrgizgende, astanalyq oqýshylardyń 70-80% úı mańyndaǵy mektepke barmaıtynyn, kún saıyn ózge aýdandarǵa qatynaıtynyn bildik. Munyń obektıvti jáne sýbektıvti sebepteri bar. Ata-analarǵa esh shekteý qoıa almaımyz. Áıtse de, balany mektepke tasý kólik keptelisiniń týyndaýyna ákep soqty. Sondyqtan, jańa mektep turǵyzar kezde ákimdiktiń naqty taldaý derekterine súıengenin qalaımyz», - dedi ol.
Astana Innovations basshysy keler jyly ashyq derekter saıasatynyń engiziletinin de jetkizdi. ıAǵnı, qala týraly keıbir derekter barlyq turǵyndarǵa qoljetimdi bolady. Sonymen birge, ákimdiktiń árbir basqarmasy óz salasy boıynsha ınnovatsııalyq jobalardy júzege asyrýdy kózdep otyr.
