Astanalyq oqýshylar shyǵarǵan oıyndardy Google PlayMarket-ten júkteýge bolady
ASTANA. QazAqparat - Astanadaǵy №53 mektep-lıtseıinde uıaly qosymshalardy jasaý zerthanasy jumys isteıdi, dep habarlaıdy QazAqparat tilshisi.
Atalǵan zerthana ashylǵaly beri mektep oqýshylary uıaly qosymshalardy jasaýdyń qyr-syry meńgerip, óz jobalaryn da iske asyryp úlgerdi. Qazirgi kezde olardyń jasap shyǵarǵan oıyndaryn Google PlayMarket-ten tabýǵa bolady. Sonyń barlyǵyn tegin júktep alýǵa múmkindik bar.
«Ashyǵyn aıtý kerek, balalardy kompıýterler men smartfondardan tolyǵymen alshaqtaý múmkin emes. Sol sebepti balaǵa aqparattyq tehnologııalardyń múmkindikterin birden kórsetip, ermek etip júrgen nárseni paıdaly iske aınaldyrǵan jón. Bolashaqta balaǵa da jeńil bolady. Máselen, qazirdiń ózinde kóptegen mamandyqtardy avtomattandyrylǵan júıler almastyryp jatyr. Bala osyny erte bilse, ómirde óz jolyn da durys tańdaı alady», - deıdi «INVENTOR» akademııasynyń ókili Oırat Azbergenov.
Mektep oqýshylary bas kezinde kompıýterlik tehnologııalarǵa arnalǵan úıirmege kóp mán bermedi. Alaıda artynan osy salaǵa qatty qyzyǵyp ketti. «Biz mobıldi oıyndardy esh qıyndyqsyz jasaýǵa bolatynyn túsindik. Bir toqsannyń ishinde ózimiz ondaı oıyndardy jasap shyǵardyq», - deıdi Áıgerim esimdi oqýshy.
Joba avtorlary aldaǵy ýaqytta Astananyń barlyq mektepterinde osy ispetti zerthanalardy ashýdy josparlap otyr. «Qazirgi kezde ınformatıka pánine kóp kóńil bólinbeıdi. 34-aq akademııalyq saǵat beriledi. Bul degenimiz, aptasyna bir ǵana sabaq ótedi. Sonyń ishinde baǵdarlamalaý tek bir toqsan ǵana oqytylady. Ol óte az», - deıdi «INVENTOR» akademııasynyń dırektory Jánibek Qydyrálıev.
