Astanalyq oqýshylar shahmat sheberimen kezdesti
ASTANA. QazAqparat - «Kel, jastar, oqylyq!» respýblıkalyq aktsııasy sheńberinde «Kerýen» SOO shahmattan halyqaralyq grossmeısteri Dınara Sádýaqasova «Nur Otan» partııasynyń «Jas Otan» jastar qanaty, Astana qalasynyń Bilim basqarmasy, «Jas Ulan» balalar jáne jasóspirimder respýblıkalyq uıymy, H.S.Omarov atyndaǵy shahmat klýbynyń ókilderimen jáne mektep oqýshylarymen kezdesti. astana.gov.kz.
Aktsııa aıasynda Dınara jas shahmatshylar men qonaqtarǵa birseanstyq oıyn berip, óz sheberligimen bólisti. Úzdik oıynshylar Dınaranyń «Shahmattaǵy alǵashqy qadamdar» atty kitabyna ıe boldy. Basylymda Dınaranyń ózindik tájirıbesi men oıyndaǵy alǵashqy qadamdary, sabaqtary berilgen bolatyn.
Kitaptyń elimizdegi shahmattyń damýyna eleýli úles qosary anyq. Kitaptardyń bir bóligi Astana qalasynyń mektepterine, taǵy bir bóligi Bilim mınıstrliginiń kómegimen basqa oblys pen qalalardyń bilim uıymdaryna berilmek.
Balalar oıynǵa qyzyǵýshylyq tanytyp, mol tájirıbe jınady. Osyndaı sheberlik synyptarynyń óskeleń urpaqqa tıgizer paıdasy kóp. Adamdardy shahmat oınaýǵa tarta otyryp, memlekettiń zııatkerlik áleýetin arttyrýǵa bolady. Zııatkerlik qoǵam qurý - memlekettik damýdyń basty baǵyttarynyń biri bolyp tabylady.
Aktsııa sońynda balalar grossmeısterdiń qoltańbasyn alyp, shaǵyn kontsert tamashalady.
