Astanalyq oqýshylar paıdaly tamaqtaný erejesin oqyp-úırenedi
ASTANA. QazAqparat - Bıylǵy oqý jylynda Astananyń 10 oqý mekemesi «Paıdaly tamaqtaný mektebi» biregeı baǵdarlamasyna qosyldy, dep habarlaıdy QazAqparat elorda ákimdiginiń resmı saıtyna silteme jasap.
Pedagogtar, dıetologtar men bilim mınıstrligi jáne Qazaq taǵamtaný akademııasynyń sarapshylary paıdaly tamaqtanýdyń qarapaıym daǵdysyn bala kezden sińirý kerek dep esepteıdi. Jobanyń basty maqsaty - óz densaýlyǵyna qamqorlyqpen qarap, paıdaly tamaqtanýdy tek balalar ǵana emes, olardyń ata-anasyna da úıretý. «Paıdaly tamaqtaný mektebi» balalardy durys tamaqtaný rejımin qalyptastyrýǵa, azyq-túlikterdiń bıologııalyq jáne taǵamdyq qundylyǵyn bilýge úıretedi. Osy alǵan biliminiń arqasynda balalardyń ómir súrý sapasy arta túsedi. Sebebi, sarapshylardyń aıtýynsha, óskeleń urpaqtyń kóptegen aýrýlary osy durys tamaqtanbaýdyń saldarynan týyndap jatyr.
«Dúnıejúzilik densaýlyq saqtaý uıymynyń málimeti boıynsha, aýrýdyń 80% belgili bir deńgeıde tamaqtanýǵa baılanysty, al syrqattyń 40% - durys tamaqtanbaýdyń tikeleı saldary. Al ony tanymdyq ári qyzyqty ete túsý úshin biz arnaıy oqý-ádistemelik quraldy daıyndadyq», - deıdi oqý quralynyń avtory, pedagogıka ǵylymynyń doktory Órik Imanǵojına.
Oqý quralyn jazýǵa tájirıbeli pedagogtar, dıetologtar, Qazaq taǵamtaný akademııasy men Bilim jáne ǵylym mınıstrliginiń ókilderi qatysty.
«Bul biregeı dápter, budan basqa mundaı oqý quraly joq. Ol oqýshylardyń paıdaly tamaqtaný erejelerin ońaı meńgerýine kómektesetin oıyn tapsyrmalarynyń júıesi túrinde berilgen. Balalar negizgi qunarly zattar, paıdaly ónimder men taǵamdar, tamaq ratsıonyn jasaý negizderi, gıgıena erejeleri týraly aqparatty jeńil, erikti túrde alady, dastarqan jaıýdy jáne ádep saqtaýdy úırenedi», - deıdi kitaptyń avtory.
Baǵdarlama synyptan tys sabaqtar, tárbıe saǵattary, mekteptegi basqa da is-sharalar arqyly engiziledi. Qaıyrymdylyq jobasy 2014 jyldan bastap Astananyń 20 mektebine engizildi, osy jyly oǵan taǵy da 10 bilim mekemesi qosyldy.
