Astanalyq oqýshylar mektepke jetý úshin bıik qorshaýdan sekirýge májbúr

ASTANA. QazAqparat - Elordalyq №84 mektep-lıtseıiniń oqýshylary bilim ordasyna jetý úshin temir qorshaýdan sekirip ótýge májbúr, dep habarlaıdy QazAqparat tilshisi.

Búgin Facebook jelisinde balasy №84 mektep-lıtseıine baratyn ata-analardyń biri Gúlsına Musaǵalı ózekti máseleni ashyna jazyp, oǵan aıǵaq bolatyn beınejazbany jarııalady. 

«Biz - «EKSPO býlvary» turǵyn úı kesheniniń turǵyndarymyz. Bizdiń balalarymyz dál osylaı mektepke barady!!! Jekemenshik aýmaq deıtin shyǵarsyzdar. Iá, sizderdiki durys, al bizge ne isteý kerek? Arnaıy daıyndalǵan jol bar deısizder. Biraq ol úshin biz avtobýspen eki aıaldama júrip, taǵy sondaı joldy jaıaý júrýimiz kerek. Alda qys kele jatyr! Qurylys júrip jatqan jerdegi BI Group-tyń qorshaýyn jyljytyp, janarmaı beketiniń qorshaýyn alyp tastaýdy jáne ol jerge asfalt tóseýdi, balalarǵa qaýipsiz jol jasaýdy usynamyn. Aldyn ala alǵys bildiremiz jáne shuǵyl iske kirisetinderińizge úmittenemiz", - dep jazdy ol. 

Atalǵan jazba men oǵan tirkelgen vıdeo áleýmettik jelini sharlap ketti. Internet-qoldanýshylar bul jaǵdaıǵa jappaı narazylyqtaryn bildire bastady.

«Esil» aýdany ákiminiń apparaty Gúlsına Musaǵalıdiń ótinishin qarap, mektep aýmaǵyna óz qyzmetkerlerin jibergen. 

«Atalǵan eskertpelerdi retke keltirý úshin jedel sharalar qabyldandy. «Qazmunaıgazǵa» qatysty zańdy buzǵany úshin hattama toltyryldy jáne ýchaskelik ınspektordyń qatysýymen qorshaý buzylatyn bolady. Jol jasalatyn orynǵa qıyrshyq tas tóseldi jáne jaqyn arada jaryq tartylady», - dep jaýap berdi áleýmettik jelige aýdandyq ákim apparatynyń qyzmetkeri Ásemgúl Tólepbergenova.