Astanalyq oqýshylar Koreıadaǵy ıntellektýaldyq olımpıadada 21 medal jeńip aldy
ASTANA. QazAqparat - Astana mektepteriniń oqýshylary Koreıada ótken ıntellektýaldyq olımpıadada barlyq 21 medal jeńip aldy, dep habarlaıdy QazAqparat.
Tedjon qalasynda ótken halyqaralyq olımpıadaǵa elordanyń ártúrli mektepterinen 21 oqýshy qatysty. Olar matematıka, bıologııa, hımııa, ekonomıka pánderi boıynsha óz jumystaryn tanystyrdy.
«Barlyq oqýshylar jumystaryn aǵylshyn tilinde tanystyrdy. Bizdiń talantty balalarymyz osymen besinshi jyl Tedjon qalasynda óner kórsetýde», - dedi «Astana Daryny» ǵylymı-praktıkalyq ortalyǵynyń dırektory Maıra Qurmanbaeva.
Qatysýshylardyń aıtýynsha, osyndaı olımpıadalar óz jobalaryn ózge elge tanystyryp, sonymen qatar shetel tilderin úırený úshin jaqsy múmkindik beredi.
«Men elimizdiń tarıhy týraly jobany kórsettim. Osylaısha, basqa elderdi bizdiń tarıhymyzben, mádenıetimizben tanystyramyz», - dedi olımpıada qatysýshylarynyń biri.
Jarys qorytyndysy boıynsha elordalyq balalar 3 altyn, 9 kúmis jáne 9 qola medal jeńip aldy.
